ވެރިކަމަށް ވަޑައިގަންނަވަމުން ރައިސުލްޖުމޫހުރިއްޔާ ޑރ.މުހައްމަދު މުއިއްޒު ވައުދުވެ ވަޑައިގެންފައިވާ ފަދައިން ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމުގެ ފުރަތަމަ މަރުހަލާ ފަށާފައިވާކަމަށް ދިފާޢީ ވުޒާރާއިން ވިދާޅުވެއްޖެއެވެ.

މިކަން ހާމަކުރައްވާ ދިފާއީ ވުޒާރާއިން ނެރުއްވި ބަޔާނެއްގައި ވިދާޅުވީ ގަމުގައި ސްޓޭޝަންކުރެވިފައިވާ ހެލިކޮޕްޓަރު ދުއްވުމަށް މިހާރު އައްޑޫގައި ޤާއިމްވެފައި ތިބި އިންޑިއާ ސިފައިންގެ ބަދަލުގައި ހެލިކޮޕްޓަރު ދުއްވުމަށް އިންޑިއާގެ އަސްކަރިއްޔާއަށް ނިސްބަތްނުވާ ކުރޫއިން މިއަދު ހަވީރު ރާއްޖެ އައިސްފައިވާކަމަށެވެ.

އެ ޓީމު މިރޭގެ ވަގުތެއްގައި އައްޑޫ ސިޓީއަށް ގޮސް، މަސައްކަތްތަކާއި ހަވާލުވުމުގެ މަސައްކަތް ފުރިހަމަކުރަން ފަށާނެކަމަށްވެސް ދިފާޢީ ވުޒާރާގެ ބަޔާނުގައި ވިދާޅުވެފައިވެއެވެ.

ދިފާއީ ވުޒާރާގެ ބަޔާނުގައި އިތުރަށް ބުނެފައި ވަނީ ދިފާއީ ވުޒާރާއިން ކަނޑައެޅިފައިވާ ތާރީހަށް އައްޑޫގައި ޤާއިމްވެތިބި އިންޑިއާގެ ސިފައިން ދިވެހިރާއްޖެއިން ފައިބާނެކަމަށެވެ.

އޭގެއިތުރުން އައްޑޫ ސިޓީ ގަމުގައި އޮޕަރޭޓްކުރަމުންދިޔަ އިންޑިއާގެ ހެލިކޮޕްޓަރުވެސް މަރާމާތަށް އިންޑިއާއަށް ގެންދިއުމަށް ހަމަޖެހިފައިވާކަމަށާއި، އަދި އޭގެ ބަދަލުގައި ގެންނަ ހެލިކޮޕްޓަރު ހިފައިގެން އަންނަ އިންޑިއާގެ މަނަވަރު މިމަހުގެ 28 ވާ ބުދަދުވަހު ރާއްޖެ އަންނާނެކަމަށްވެސް ދިފާއީ ވުޒާރާއިން ވިދާޅުވެއެވެ.

ދިފާއީ ވުޒާރާއިން މިރޭ ނެރުނު ބަޔާން ނިންމާލައިފައި ވަނީ ސަރުކާރުގެ އަމާޒަކީ ދިވެހިރާއްޖޭގެ ސިޔާދަތާއި ދިވެހީންގެ މިނިވަންކަމާއި އަމިއްލަވަންތަކަން ހިމާޔަތްކޮށް ރައްކާތެރިކުރެވޭނެހެން، ރަހުމަތްތެރި ޤައުމުތަކާއެކު ދިފާއީ އަދި ސަލާމަތާއި ގުޅުންތައް ބަދަހިކުރުންކަމަށް ވިދާޅުވަމުންނެވެ.