ސައުދީ ފުޓްބޯޅަ ފެޑަރޭޝަނުން އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ ދެ މެޗަށް ސަސްޕެންޑްކޮށް ބޮޑު އަދަދަކުން ޖޫރިމަނާކޮށްފައި ވާކަމަށް ޑެއިލީ މެއިލް އިން ރިޕޯޓް ކޮށްފިއެވެ.

ސައުދީ މީޑިއާތަކާއި ހަވާލާދީ ޑެއިލީ މެއިލް އިން ރިޕޯޓް ކޮއްފައިވާ ގޮތުގައި ރޮނާލްޑޯ އާއި މެދު ސައުދީ ފުޓްބޯޅަ ފެޑަރޭޝަނުން އެފަދަ ނިންމުމެއް ނިންމާފައިވަނީ ލީގުގައި އެންމެ ފަހުން ކުޅުނު މެޗަށްފަހު އަލް ޝަބާބުގެ ސަޕޯޓަރުނާއި ދިމާލަށް އިޝާރާތްކޮށް ކުޅިވަރުގެ ރޫހާ ހިލާފު އަމަލެއް ހިންގާފައި ވާތީއެވެ.

ލީގުގައި މިދިޔަ އާދިއްތަ ދުވަހުގެ ރޭ ރަށުން ބޭރުގައި އަލް ޝަބާބު އާއި ދެކޮޅަށް އަލް ނަސްރު ކުޅުނު މެޗު 3-2 ގެ ނަތީޖާއަކުން އެޓީމު ކާމިޔާބުކުރި އިރު، އަލް ނަސްރުގެ ފުރަތަަމަ ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ކްރިސްޓިއާނޯ ރޮނާލްޑޯ އެވެ. 

Advertisement

މެޗު ފެށުނީއްސުރެ އަލް ޝަބާބުގެ ކުޅުންތެރިން ދިޔައީ ރޮނާލްޑޯ އާއި ދިމާކޮށް ފުރައްސާރަކުރަމުންނެވެ. އެގޮތުން ރޮނާލްޑޯއަށް ބޯޅަ ލިބޭ ކޮންމެ ފަހަރަކު މެސީގެ ނަމުން ގޮވައި ޖެއްސުން ކުރުމުގެ ނަތީޖާއަކަށް ވީ މެޗުގެ ފަހު ކަށިގަނޑާއެކު ރޮނާލްޑޯ ވަނީ އަލް ޝަބާބުގެ ސަޕޯޓަރުނާއި ދިމާލަށް އިޝާރާތްކޮށް ކުޅިވަރުގެ ރޫހާ ހިލާފު އަމަލެއް ހިންގާފައެވެ.

މި ސަސްޕެންޝަނާއި އެކު ލީގުގައި މިހަފްތާގެ ބްރާސްފަތި ދުވަހުގެ ރޭ އަމިއްލަ ދަނޑުގައި އަލް ހަޒަމް އާއި ދެކޮޅަށް ކުޅޭ މެޗާއި އޭއެފްސީ ޗެންޕިއަންސް ލީގުގެ ކުއާޓަރ ފައިނަލުގެ ފުރަތަަމަ ލެގުގައި ޔޫއޭއީގެ އަލް އައިން އާއި ދެކޮޅަށް އަލް ނަސްރު ކުޅޭ މެޗުގައި ރޮނާލްޑޯއަށް ނުކުޅެވޭނެއެވެ.

ސައުދީ ލީގުގައި ކޮންމެ ޓީމަކުން 21 މެޗު ކުޅެފައިވާއިރު ލީގު ތާވަލްގެ ކުރީގައި މިވަގުތު އޮތީ މެޗަކުން ބަލިނުވެ، 59 ޕޮއިންޓާއެކު އޮތް އަލް ހިލާލް އެވެ. ދެވަނަގައި އޮތް އަލް ނަސްރަށް 21 މެޗުން 52 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ ދެވަނައިގަ އެވެ.ޕ