ކުރިއަށް މިއޮތް 20 ވަނަ ރައްޔިތުން މަޖިލިހުގެ އިންތިހާބުގައި، އެ ބައެއްގެ މައްޗަށް، ބާރުގަދަ އެހެން ބަޔަކު އަންގާ އެންގުމަކަށް އޮޕަރޭޓް ކުރާ ބަޔަކަށް ވޯޓް ނުދިނުމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު އެދި ވަޑައިގެންފިއެވެ.
އެމަނިކުފާނު މިފަދައިން އެދިވަޑައިގެންފައިވަނީ މިހާރު ރާއްޖޭގެ އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ނ.ހޮޅުދޫއަށް ވަޑައިގެން ހޮޅުދޫގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ.
ރައީސް ޑރ.މުހައްމަދު މުއިއްޒު ވިދާޅުވީ ކުރިއަށް މިއޮތް ދުވަސްތަކުގައި، ރައްޔިތުންގެ މަޖިލީހުގެ އިންތިޚާބުގައި، ރައްޔިތުން މި ނިންމަންޖެހެނީ، ރައްޔިތުން އެދި، ރައްޔިތުން އުންމީދުކުރާ ކަހަލަ ދިވެހި ޤައުމެއް ބިނާކުރުމުގެ ނިންމުންކަމަށެވެ.
"އެބައެއްގެ މައްޗަށް ބާރުގަދަ އެހެން ބަޔަކު އަންގާ އެންގުމަކަށް އޮޕަރޭޓްވާ، ބޭނުން ގޮތަކަށް ވޯޓް ދިނުމުގައި ތަބާވާ 'އަޅުން' ތަކެއްގެ ގޮތުގައި ތިބޭ މެންބަރުންތަކެއް މަޖިލީހަށް ވެއްދުމަކީ މިދިޔަ ތިން މަސްދުވަހުގެ ތެރޭގައި އަޅުގަނޑެމެންނަށް ފެނުނު މަންޒަރު ތަކުރާރުވެ ދުވަހަކު ވެސް ދެން ރާއްޖެއަށް އަނބުރާ އިއާދަނުކުރެވޭނެ ހިސާބަކަށް ގައުމުގެ ކަންކަން ދާނެ ކަމަކަށް ވެގެންދާނީ،"
ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.
މިއަދުގެ މަޖިލަހަކީ ޤައުމު އިސްކުރުމުގެ ބަދަލުގައި ވަކި ބަޔަކު އަންގާ ގޮތަކަށް ކަންތައްތައް ކުރަމުން ގެންދާ ޤާނޫނަށް ބޯލެބުމެއް ނެތި ކަންތައްތައް ކުރަމުން ގެންދާބައެއް ކަމަށާއި، އެއްވެސް ހާލެއްގައި އަޅުގަނޑުމެން މަޖިލހަށް ގެންނަށް ބޭނުންވަނީ އެފަދަބައެއް ނޫންކަމަށް ރައީސް ވިދާޅުވިއެވެ.
މަޖިލިހަށް މީހަކު އިންތިހާބު ކުރުމުގައި މި ސަރުކާރުން ރައްޔިތުންނަށް ކޮށްދޭން ބޭނުންވާ ކަންތައްތައް ބާރުސްޕީޑުގައި ، ގެންދެވޭނެ ފަދަ ގޮތަކަށް ވިސްނުން ބެހެއްޓެވުމަށް ރައީސް ޑރ.މުހައްމަދު މުއިއްޒު ވަނީ ހޮޅުދޫ ރައްޔިތުންގެ ކިބައިންވެސް އެދި ވަޑައިގެންފައެވެ.
Advertisement
This content is created and paid for by advertisers and does not involve Voice Journalists
