ކުރިއަށް އޮތް 20 ވަނަ ރައްޔިތުން މަޖިލީހުގެ އިންތިހާބު އަންނަ އެޕްރީލްމަހު 21 ވަނަ ދުވަހު ބޭއްވުމަށް އިލެކްސަން ކޮމިޝަނުން ނިންމައިފިއެވެ.

އެކޮމިޝަނުން މީގެ ކުރިން ނިންމާފައިވަނީ އަންނަ މާރޗު މަހުގެ 17 ގައި އިންތިހާބު ބޭއްވުމަށެވެ. ނަމަވެސް ރޯދަމަސް ނިމި 10 ދުވަސްފަހުން  އިންތިހާބު ބާއްވަން ޖެހޭގޮތަށް ރައްޔިތުންގެ މަޖިލިހުން އިންތިހާބާއި ބެހޭ ޤާނޫނަށް ގެނައި އިސްލާހާއި ގުޅިގެން އިންތިހާބު ބޭއްވޭނެ ދުވަހަކާއި މެދު އާއްމުން ތިބީ ސުވާލެއްގެ ތެރޭގައެވެ.

އާއްމުންނަށް މި ގޮތަށް ތިބެން ޖެހުނީ މަޖިލިހުން ފާސްކުރި އިންތިހާބު ފަސްކުރުމާއި ގުޅޭ އިސްލާހުގެ ބިލް ރައީސް ތަސްދީގު ނުކުރައްވާ އޮތުމާއި ގުޅިގެން އީސީން ޢަމަލުކުރާނެގޮތަކާއި މެދުގައެވެ.

ނަމަވެސް ބަންޑާރަ ނައިބުގެ ލަފާފުޅާއި އެއްގޮތަށް ރައީސް، އެ ބިލު ތަސްދީގު ކުރެއްވުމާއެކު، ރޯދަ މަހު އެއްވެސް އިންތިޚާބެއް ބޭއްވުމަކީ ގާނޫނީ ގޮތުން މަނާކަމެކެވެ. އެހެންކަމާއި އެކު އީސީން ވަނީ ކުއްލި ބައްދަލުވުމެއް ރޭ ބާއްވާފައެވެ. އަދި އީސީގެ މިބައްދަލުވުމުގައި ނިންމާފައި ވަނީ އިންތިހާބުގެ ތާރީހު އޭޕްރީލް 21 އަށް ބަދަލުކުރުމަށެވެ. އިންތިހާބުގެ ވޯޓް ނެގުން އޮންނާނީ ހެނދުނު 8:00 އިން ހަވީރު 4:00 އަށް ކަމަށް އެ ކޮމިޝަނުން މައުލޫމާތު ދެއްވިއެވެ.