ސަރުކާރުން ކުރިއަށްގެންދާ ކަންކަމަށް ހުރަސްތައް ކުރިމަތި ކުރުވާނަމަ ދަތިވެ، މަސައްކަތްތައް ލަސްވާނެ ކަމަށް ރައީސުލްޖުްމޙޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ބ އަތޮޅާއި ރ އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ރ.އަލިފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވަމުން ރައީސް ޑރ.މުއިއްޒު ވިދާޅުވީ ނަތީޖާ ނެރެދެވޭނީ ރައްޔިތުންގެ އެއްބާރުލުން ލިބިިގެން ކަމަށާއި، އެއާއި ޚިލާފަށް ކަންކަމުގައި ހުރަސް އަޅައި, އެއްބާރުލުން ނުދޭނަމަ މަސައްކަތްތައް ލަސްވާނެ ކަމަށެވެ.

ރައީސް ޑރ.މުއިއްޒު ވިދާޅުވީ މަޖިލީހުގައި ތިއްބެވި އިދިކޮޅު ބައެއް މެމްބަރުން ބަޖެޓް ފާސްކޮށް ދީފައިވާ ކަމަށާއި މަޝްރޫއުތައް މިހާރު ކުރިއަށް ދާން ޖެހޭނެ ކަމަށް ވިދާޅުވި ނަމަވެސް ހުރިހާ ވައުދުތައް ފުއްދުމަށް 10 ދުވަސް ތެރޭގައި ބަޖެޓްގައި ހިމަނާފައި އެމަނިކުފާނު ފޮނުވި ނަމަވެސް ފާސްކުރީ އެބޭފުޅުން އުނިކުރަން ބޭނުންވާ އެއްޗެހި އުނިކުރުމަށްފަހުގައި ކަމަށެވެ. އެހެން ކަމުން ޚަރަދު މަދުކޮށް، އާމްދަނީ އިތުރުކޮށްގެން ކުރަން ޖެހޭ މުހިންމު ކަންކަމަށް އިސްކަންދީގެން ހުރިހާ މަޝްރޫއުއެއްވެސް ކުރިއަށްގެންދާނެ ކަމަށް ރައީސް ޑރ.މުއިއްޒު ވިދާޅުވިއެވެ.

ރިޔާސީ އިންތިހާބުގައިވީ ވައުދުތައް ހަނދާން އެބަހުރި ކަމަށް ވިދާޅުވެ ރައީސް ޑރ.މުއިއްޒު ވަނީ ރައްޔިތުން އެމަނިކުފާނާއި ހަވާލުކުރި ޒިންމާ ފުރިހަމައަށް އަދާކުރަން ބޭނުންފުޅުވާކަމަށް ވެސް ވިދާޅުވެފައެވެ.

އަލިފުށީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ޑރ.މުއިއްޒު ވަނީ އެރަށުގެ ބިން އިތުރު ކުރުމުގެ މަޝްރޫއާއި, ރަށުގެ ސިއްހީ މަރުކަޒު ހޮސްޕިޓަލަށް ބަދަލުކޮށްދީ ރަނގަޅު ފެންވަރުގެ ހިދުމަތް ލިބޭ ތަނަކަށް ހަދައިދެއްވާނެ ކަމަށް ވިދާޅުވެފައެވެ.