ރ.އަލިފުށި އެއަރޕޯޓް މަޝްރޫއާއި އެކީގައި ބިން ހިއްކާ، އެ ރަށުގައި ސިނާއީ ސަރަހައްދެއް ގާއިމުކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ އަތޮޅު ތެރެއަށް މިހާރު އެމަނިކުފާނު ކުރައްވާ ދަތުރުފުޅުގެ ތެރެއިން ރ.އަލިފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ޑރ.މުއިއްޒު ވަނީ އަލިފުށީގެ ތަރައްގީން މިހާތަނަށް ދޫވެފައިހުރި ހުރިހާ މަސައްކަތްތައް މިސަރުކާރުގައި ހަގީގަތަކަށް ހަދައިދޭނެ ކަމަށް ވިދާޅުވެ، އަލިފުއްޓަށް ސަރުކާރުން ވީ ކޮންމެ ވަޢުދެއް، އަވަސްމިނުގައި ހާސިލްކޮށްދެއްވާނެ ކަމުގެ ޔަގީންކަން އެ ރަށުގެ ރައްޔިތުންނަށް ދެއްވާފައެވެ.

މިގޮތުން އެރަށުގެ އެއާޕޯޓު މަޝްރޫއަށް އިޝާރާތްކުރައްވާ ރައީސް ޑރ.މުއިއްޒު ވިދާޅުވީ އެއާޕޯޓް ގެ މަސައްކަތް އަވަސްކޮށް، ރައްޔިތުން އެދޭ ބާރު ސްޕީޑްގައި މި މަސައްކަތް ކުރިއަށްގެންގޮސް، ރައްޔިތުންގެ އުއްމީދުތައް ހާސިލްވާ މަޝްރޫއު އަކަށް ހައްދަވައިދެއްވާނެ ކަމަށެވެ. އަދި އެއާޕޯޓް މަޝްރޫއުގެ އިތުރުންވެސް އަލިފުށީގެ ބިން އިތުރަށް ހިއްކާ، ރަށުގައި ސިނާއީ މަސައްކަތްތައް އިތުކުރެވޭނެ މަގު ފަހިކޮށްދެއްވާނެކަމަށް ވެސް ރައީސް ޑރ.މުއިއްޒު ވިދާޅުވިއެވެ.

Advertisement

ރައީސް ޑރ.މުއިއްޒު ވިދާޅުވީ އަލިފުށީގައި ތަރައްގީ ކުރެވިގެންދާ ސިނާއީ ސަރަހައްދުގެ ސަބަބުން ރަށުގައި ތިބެގެން އާމްދަނީ ހޯދޭނެ ފުރުސަތު އިތުރުވެގެން ދާނެ ކަމަށެވެ.

އަލިފުށީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ޑރ.މުއިއްޒު ވަނީ އެރަށުގެ ބިން އިތުރު ކުރުމުގެ މަޝްރޫއާއި, ރަށުގެ ސިއްހީ މަރުކަޒު ހޮސްޕިޓަލަށް ބަދަލުކޮށްދީ ރަނގަޅު ފެންވަރުގެ ހިދުމަތް ލިބޭ ތަނަކަށް ހަދައިދެއްވާނެ ކަމަށް ވިދާޅުވެފައެވެ.