ޖަރުމަނު ބުންޑަސްލީގާގައި އާދީއްތަ ދުވަހުގެ ރޭ ރަށުން ބޭރުގައި އެފްސީ ކޮލޯންއާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް ލެވަކޫސަން އިން ލީގު ތާވަލުގެ ކުރީގައި 10 ޕޮއިންޓްގެ ލީޑެއް ނަގައިފިއެވެ.

މެޗު ފެށިގެން 14 ވަނަ މިނެޓުގައި ކޮލޯންގެ ފޯވާޑް ޖާން ތިއެލްމަން ކުރި ކުށަކާއި ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

މިސީޒަނުގައި އަދި މިހާތަނަށް މެޗަކުން ބަލިވެފައި ނުވާ ލެވަކޫސަން އިން މެޗުގެ ލީޑު ހޯދީ ފުރަތަމަ ހާފުގެ 38 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ނެދަލޭންޑްސްގެ ޑިފެންޑަރު ޖެރެމީ ފްރިމްޕޮން އެވެ. 

Advertisement

މީގެ އިތުރުން ވެސް މިހާފުގައި އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ލެވަކޫސަން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ލެވަކޫސަން އިން މެޗު ޑޮމިނޭޓުކުރި އިރު އެޓީމުން ލީޑު ފުޅާކުރި ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ ސްޕެނިޝް ޑިފެންޑަރު އެލެކްސް ގްރިމާލްޑޯ އެވެ. މިއީ އެޓީމުގެ މޮރޮކޯ މިޑްފީލްޑަރު އަމީން އާދިލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލެވަކޫސަން ކުރީގައި އޮވެގެންނެވެ. އަދި މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 24 މެޗުން އެޓީމަށް 64 ޕޮއިންޓް ލިބިފައިވާއިރު، ދެވަނަގައި އޮތް ބަޔާން މިއުނިކަށް 24 މެޗުން ލިބިފައިވަނީ 54 ޕޮއިންޓެވެ. އަދި މިމެޗުން ބަލިވި ކޮލޯން އިން ލީގުގައި ކުޅުނު 24 މެޗުން ލިބުނު 17 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 16 ވަނައިގައެވެ.