އަންނަ މެއި މަހުގެ 10 ވަނަ ދުވަހަށް ފަހު، ޔުނީފޯމުގައި ވިޔަސް އަދި ކުލަ ހެދުމުގައި ވިޔަސް އިންޑިއާގެ ސިފައިން ރާއްޖޭގައި ގާއިމުވެ ނުތިބޭނެ ކަމުގެ ޔަގީންކަން ރައީސުލްޖުމުހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.

ރޭ ބ.އޭދަފުށީ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ އިސްލާމްދީނަށް ނަސްރުދީ މިނިވަންކަން ޔަގީން ކޮށްދިނުމަށްވުރެ ބޮޑު ކަމެއް ރައީސްގެ ހައިސިއްޔަތުން އެމަނިކުފާނަށް ނެތް ކަމަށެވެ.

އެގޮތުން، މިނިވަންކަން ޔަގީންކޮށްދިނުމަށްޓަކައި މިހާތަނަށް ކުރެވިފައިވާ ކަންކަމުގެ މައްޗަށް އަލިއަޅުވާ ލައްވަމުން ރައީސް ވިދާޅުވީ، ރާއްޖޭގައި ތިބި އިންޑިއާ ސިފައިން ބޭލުމުގެ މަސައްކަތުގެ ތެރެއިން އިންޑިޔާގައި އެކަން ދަންނަވައި، އެ ސިފައިން ރާއްޖެއިން ބޭލުމަށް އެމީހުން އެއްބަސްވެފައިވާ ކަމަށެވެ.

Advertisement

އެގޮތުން މާޗު މަހުގެ 10 ވަނަ ދުވަހުގެ ކުރިން އިންޑިއާ ސިފައިންގެ އެއް ބެޗު ރާއްޖެއިން ފައިބައި، ބާކީ ތިބި އެންމެން އަންނަ މެއި މަހުގެ 10 ވަނަ ދުވަހުގެ ކުރިން ފައިބާނެ ކަމުގެ ޔަގީންކަން ރައީސް ދެއްވި އެވެ.

މި ސަރުކާރު ވެރިކަމަށް އައުމަށް ދިވެހިން ގާތުގައި ވި އެންމެ ބޮޑު ވަޢުދަކީ ވެސް ރާއްޖޭގައި ތިބި އިންޑިޔާ ސިފައިން ރާއްޖެއިން ބޭލުމެވެ. ރައީސްޑރ. މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރައްވަން އެ މަނިކުފާނު ނިންމަވާފައިވާ އެންމެ މުހިއްމު ކަމަކީވެސް ރާއްޖޭގައި ތިބި އިންޑިއާގެ ހުރިހާ ސިފައިން ރާއްޖެ އިން ބޭލުމެވެ.