ދ.ބަނޑިދޫ ގެ ރައްޔިތުން އައިސް ޕްލާންޓެއްގެ ޚިދުމަތް ބޭނުންވާކަމަށް އެރަށުގެ ކައުންސިލުން ބުނެފިއެވެ.

ބަނޑިދޫ ކައުންސިލުން މިފަދައިން ބުނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަތޮޅުތެރެއަށް ކުރައްވާ ދަތުރުފުޅުގެ ތެރެއިން ބަނޑިދޫ ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީއާއި އކު ބޭއްވި ބައްދަލުވުމުގެ ތެރެއިންނެވެ.

މިބައްދަލުކުރެއްވުމުގައި ބަނޑިދޫ ރައްޔިތުން އެންމެ ބޭނުންވާ ކަންކަމާއި، ރައްޔިތުންގެ ހުރި ކަންބޮޑުވުންތަކާ ގުޅޭގޮތުން ވަނީ މަޝްވަރާކޮށްފައެވެ.

އޭގެ ތެރޭގައި އެރަށުގެ ކައުންސިލުން ފާހަގަކުރި ކަންތައްތަކުގެ ތެރޭގައި، ރަށުގެ ގިރާ ސަރަހައްދު ހިމާޔަތްކުރުމާއި، ބަނޑިދޫގައި މަލްޓިޕާޕަސް ހޯލެއް ޤާއިމުކުރުމުގެ އިތުރުން ރަށުގެ ކައުންސިލް އިދާރާގެ އާ އިމާރާތެއް ޤާއިމުކުރުމަށް ބޭނުންވާކަމުގައި ފާހަގަކުރިއެވެ. އަދި އިންޖީނުގެ މިހާރު ހުރިތަނުން އެހެން ތަނަކަށް ބަދަލުކުރުމަށް ބޭނުންވާކަމަށާއި، ކުނި ނައްތާލުމުގެ ހަރުދަނާ ނިޒާމެއްގެ މުހިންމުކަން ވެސް ކައުންސިލުން ވަނީ ފާހަގަކޮށްފައެވެ.

މި ބައްދަލުވުމުގައި ބަނޑިދޫ އ.ތ.މ ކޮމިޓީން ވަނީ ރަށުގައި ކުނި ނައްތާލުމުގެ ހަރުދަނާ ނިޒާމެއް ނެތުމުން ކުރިމަތިވާ ގޮންޖެހުންތައް ރައީސް ޑރ.މުއިއްޒު އާއި ހިއްސާކުރެއްވުމުގެ އިތުރުން، ކަނބަލުންނަށް ކުޅިވަރުގެ ދާއިރާއިން ކަންކަން ފަހިކޮށްދެއްވުމަށް އެދިފައެވެ.

މި ބައްދަލުވުމުގެ ތެރެއިން ރައީސް ޑރ.މުއިއްޒު، ކައުންސިލުން ފާހަގަކުރެއްވި ކަންކަމަށް ވަކިވަކީން އަލިއަޅުވާލައްވައި އެކަންކަމަށް ހުރި ހައްލުތަކާގުޅޭގޮތުން މަޝްވަރާކުރައްވާފައިވާއިރު، ކައުންސިލުން ފާހަގަކުރެއްވި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ އެންމެ ފަހުގެ މަޢުލޫމާތު މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ވަނީ ހިއްސާކުރައްވާފައެވެ.