ފެލިދެ އަތޮޅު ފެލިދޫގެ ބިންހިއްކުމުގެ މަސައްކަތް އެންމެ އިސްކަންދޭ ކަންކަމުގެ ތެރޭގައި ހިމަނުއްވައި، މިއަހަރު އެ މަޝްރޫޢު ފަށްޓަވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ފެލިދޫގެ ރައްޔިތުންނާ ރޭ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ، އެމްޑީޕީ މެޖޯރިޓީ އޮތް މަޖިލީހުން މިއަހަރުގެ ބަޖެޓް ފާސްކޮށްފައިވަނީ، މަޝްރޫޢުތަކަށް 'ކުދިކުދި އަދަދު ކަނޑައަޅައިގެން' ކަމަށެވެ. އެގޮތުން ކަނޑައަޅާފައިވާ ފައިސާގައި މަޝްރޫޢުތައް ފަށައި ކުރިއަށްގެންދާނެހާ މިންވަރުވެސް ނެތް ކަމަށް އެމަނިކުފާނު ވިދާޅުވި އެވެ.
އެގޮތުން ފެލިދޫގެ ބިން ހިއްކުމުގެ މަޝްރޫޢުއަށް ވެސް ކަނޑައަޅާފައިވާ ފައިސާ އަކީ އެކަން ކުރެވޭ ވަރަށްވުރެ މަދު ފައިސާ ކަމަށާ، އެހެން ނަމަވެސް އަމާޒަކީ މިއަހަރު އެ މަސައްކަތް ފަށައި ނިންމާލުން ކަމަށް އެމަނިކުފާނު ވިދާޅުވި އެވެ.
ކޮންމެ ގޮތެއްވިއަސް ބިން ހިއްކުމަކީ އަޅުގަނޑު ވީ ވަޢުދެއް. އަދި އެއީ މި ރަށަށް އެންމެ މުހިންމު މައްސަލަ ހައްލު ކުރުމަށް ކުރަންޖެހޭ ކަމެއް. އެހެންވީމާ، މި މަޝްރޫޢު މި ރަށުގެ ފަޅުތެރޭ، ޖާގަ އޮތް މިންވަރަކުން، ލޭންޑްޔޫސް ޕްލޭންގައި ހިމަނާފައި އޮތް ވަރަށް އިރާދަކުރެއްވިޔާ ހިއްކައިދޭނެ ކަމަށް ޔަގީންކަން ދެން. އެކަން މި އަހަރުގެ ތެރޭގައި ވީހާވެސް އަވަހަށް ފަށާނަން. ބަޖެޓްގައި ކަނޑައެޅިފައިވާ މިންވަރަކުން މަޝްރޫޢު ފެށޭ އަވަސް މިން ލަސްމިން ޑިޕެންޑްވޭ. އެއީ ކުރީގައި ފަށައިފިއްޔާ އެޑްވާންސް ޕޭމަންޓް ނުދެވޭ ވަރަށް ފައިސާ ޖަހާފައި ހުރިއްޔާ މަޝްރޫޢު މެދުތެރެއިން ހުއްޓެނީ. އެހެންވީމާ މަޝްރޫއު ލަސްކޮށްލަންޖެހޭ އަހަރުގެ މެދުތެރޭއަށް ނޫނީ އެއަށްވުރެ ފަހަށް. ކޮންމެ ގޮތެއް ވިޔަސް މިއަހަރު ތެރޭގައި މަސައްކަތް ފަށައި ނިންމާލުން އަޅުގަނޑުގެ އަމާޒަކީ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެ އިތުރުން ރާއްޖޭގެ އެކި ކަންކޮޅުތަކުގައި ގެދޮރުވެރިކަމުގެ މަޝްރޫޢުތަކުގެ އަމަލީ މަސައްކަތްތައް ވެސް މިއަހަރުގެ ތެރޭގައި ފެށޭނެކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އަތްފޯރާ ފަށުގައި ހައުސިންގ ލޯނު ސްކީމުތައް ވެސް ތައާރުފު ކުރާނެކަން އެމަނިކުފާނުގެ ވާހަކަފުޅުގައި ތަކުރާރުކުރެއްވިއެވެ.
ފެލިދޫގެ ތަރައްޤީއަށް ރޭވިފައިވާ ކަންކަމުގެ ތެރެއިން، އެރަށު ސްކޫލުގައި އިމާރާތްކުރުމަށް ނިންމާފައިވާ ކްލާސްރޫމްތަކާއި މަލްޓިޕަރޕަސް ހޯލް ބިނާކުރާނީ ބިމުން ބޮޑު ޖާގައެއް ނުގެއްލޭނެހެން، 4 ބުރި އިމާރާތެއްގެ ގޮތަށްކަމަށް ރައީސްގެ ވާހަކަފުޅުގައި ވަނީ އިޢުލާނުކުރައްވާފައެވެ. މީގެ އިތުރުން ހޮސްޕިޓަލުގެ ފެންވަރު މަތިކޮށްދީ، ކުޅިވަރު ކުޅުމަށްޓަކައި ސްޕޯޓްސް ކޮމްޕްލެކްސްއެއް ރައްޔިތުން އެދޭ ގޮތަށް ހައްދަވައިދެއްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
