ވެރިކަން ބަދަލުކޮށް، ރައީސުލްޖުމުހޫރިއްޔާ ޑރ. މުހައްމަދު މުޢިއްޒަށް ވެރިކަން ހޯދައިދިނުމަކީ ހެދުނު ގޯހެއްކަން ރައްޔިތުންނަށް ޔަގީންވެފައިވާ ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ. 

އެމްޑީޕީގެ ޓިކެޓުގައި ގދ. ގައްދޫ ދާއިރާއަށް ވާދަކުރައްވާ ކުރީގެ ފެނަކައިގެ މެނޭޖިން ޑިރެކްޓަރު އަހުމަދު ސައީދުގެ މާލޭ ކެމްޕޭނު އޮފީސް ހުޅުއްވުމަށް ރޭ ބޭއްވި ޖަލްސާގައި ވާހަކަދައްކަވަމުން ރައީސް ސޯލިހު ވިދާޅުވީ، މި ސަރުކާރު ވެރިކަމަށް އައުމަށްޓަކައި ރައްޔިތުންނަށް ދެއްކި ހުވަފެނާއި، ހެދި ދޮގުތަކާއި އޮޅުވާލުންތަކުގެ ހަގީގަތް މިހާރު ރައްޔިތުންނަށް ހާމަވަމުންދާ ކަމަށެވެ.

ރައީސް ސޯލިހު އިތުރަށް ވިދާޅުވީ، މިސަރުކާރު ހަމަ މަގަށް އެޅުވުމަށް މަސައްކަތް ކުރެވެން އޮތް ތަނަކީ ރައްޔިތުންގެ މަޖިލީސް ކަމަށެވެ.

ކަންމިހެން ހުރުމުން، ސަރުކާރު ޖަވާބު ދާރީ ކުރުވައި، ރައްޔިތުންނަށް ސަރުކާރު ތެރޭގައި ކަން ހިނގާ ގޮތް އޮޅުން ފިލުވައިދިނުމަށް ފަސޭހަ ކުރުމަށް ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށް ޞާލިހު ވިދާޅުވި އެވެ.

ރައީސް ޞާލިހު ވިދާޅުވި ގޮތުގައި، އިދިކޮޅު މެންބަރުންގެ ގޮތުގައި މަޖިލީހުގައި ތިއްބަވާ ބޭފުޅުންނަކީ ވަރަށް ރަނގަޅު ޢަޒުމެއްގައި ކެރިގެން މަސައްކަތް ކުރަންޖެހޭ ބައެއް ކަމަށެވެ. އަދި ސަޢީދަކީ އެފަދަ ބޭފުޅެއް ކަމަށް ވިދާޅުވެ އެމަނިކުފާނު ވަނީ ސަޢީދަށް ވަރަށްބޮޑަށް ތަޢުރީފް ކުރައްވާފައެވެ.