މިއަހަރުތެރޭގައި 50 ރަށެއްގައި، 50 ކައުންސިލް ޢިދާރާ ޢިމާރާތް ކުރައްވާނެ ކަމަށް ވިދާޅުވެ ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވެލެއްވި ވަޢުދާއި އެއްގޮތަށް، އަޅާ 50 ކައުންސިލް އިމާރާތް ކަނޑައެޅުމަށް މާރކްސް ދޭނެ ކްރައިޓީރިއާ ތައް ކަނޑައަޅައި، އާއްމުންގެ ޚިޔާލަށް ހުޅުވާލަން ސަރުކާރުން ނިންމައިފިއެވެ.
ދާދިފަހުން ރައީސް މުޢިއްޒު ހދ. މަކުނުދޫ އަށް ވަޑައިގެން އެރަށުގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައި، އެމަނިކުފާނު ވަނީ، ކައުންސިލްތަކުގެ އިމާރާތްތަކަށް ދިމާވެފައިވާ މައްސަލަ ހައްލުކުރުމަށް ޚާއްޞަ އިސްކަމެއް ދީގެން، އިންވެސްޓަރ ފައިނޭންސްގެ އުޞޫލުން ކައުންސިލް އިދާރާތަކުގެ ޢުމްރާނީ ތަރައްޤީއަށް ޚާއްޞަ މަސައްކަތްތަކެއް ކުރައްވަމުން ގެންދަވާނެ ކަމަށް ވިދާޅުވެފައެވެ.
"ރައްޔިތުންނަށް މި ޚިދުމަތް ދޭންހުރި ކައުންސިލްތަކަށް ބޭނުންވާ މަރުކަޒުތައް އަޅައި ދިނުމަށްޓަކައި ފަށާ މަސްރޫއެއް، މި މަޝްރޫއުގެ ފުރަތަމަ ފިޔަވަހީގައި ، ފަންސާސް ރަށެއްގައި ފަންސާސް ރަށު ކައުންސިލް އޮފީސް އަޅުގަނޑުމެން ޢިމާރާތްކޮށްދޭނަށް" މަކުނުދޫގައި ވާހަކަފުޅު ދައްކަވަމުން ރައިސުލްޖުމުހޫރިއްޔާ ވިދާޅުވިއެވެ.
ރައީސް އިތުރަށް ވިދާޅުވީ އެމަނިކުފާނު ގެ އުންމީދަކީ އަދި މަސައްކަތް ކުރައްވާނީ ކައުންސިލް އޮފީސް އިމާރާތްކުރުމުގެ މަސައްކަތް 50 ރަށުގައި އެއްފަހަރާ ފެށުމަށް ކަމަށެވެ.
އެކަމާއި ގުޅޭ އިތުރު ތަފްސީލް ދެއްވަމުން، މިއަދު ސިޓީ ތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ފަރާތުން ބޭއްވި ބައްދަލުވުމުގައި އެ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވީ، މިހާތަނަށް ރަށް ރަށަށް ކުރެވުނު ޒިޔާރަތްތަކުން، އަތޮޅުތަކާއި ރަށް ރަށުގެ ކައުންސިލްތައް އުމްރާނީ ގޮތުން ވަރަށް ބޮޑަށް ބާވެ ހަލާކުވެފައިވާ ކަން ފާހަގަކުރެވުނު ކަމަށެވެ.
އަދި އެކަން ހައްލު ކުރުމަށް ރައީސް ނިންމެވި ނިންމުމާއި އެއްގޮތަށް، އެ މަސައްކަތް ކުރެވޭނެ މަގުފަހިވެސް މިހާރު ކޮށްދެއްވާފައިވާ ކަން އޭނާ ފާހަގަކުރެއްވިއެވެ.
އަޅުގަނޑު މިހާރު މިވަނީ، މި 50 ކައުންސިލް ހޮވާނެ ގޮތުގެ ކްރައިޓީރިއާ ޑިވެލޮޕް ކޮށްފައި. އަޅުގަނޑުމެން އިރާދަކުރެއްވިޔާ އަންނަ ހަފްތާގެ ތެރޭގައި، އެ ކްރައިޓީރިއާ އާއްމުންގެ ކޮމެންޓަށް ހުޅުވާލާނަން. އަޅުގަނޑުމެން އެ ބޭނުން ކުރާނީ އިތުރު ރުބްރިކޭޓް މާކްސް ދޭނެ ގޮތް ކަނޑައެޅި އޭގެ މައްޗަށް ބިނާކޮށް.
އާދަމް ޝަރީފް ޢުމަރު
މިއާއެކު ޝަރީފް ވަނީ އަލަށް އަޅާނެ ކައުންސިލް ހޮވުމަށް މިހާރު ކަނޑައަޅާފައި ކްރައިޓީރިއާ ތައްވެސް ހާމަ ކުރައްވާފަ އެވެ. އެއީ؛
1) ރަށުގެ އާބާދީއަށް 20 އިންސައްތަ
2) ކައުންސިލް ތަކުގެ ވަސީލަތް ހުރި މިންވަރަށް 20 އިންސައްތަ
3) އިމާރާތުގެ ހާލަތަަށް 20 އިންސައްތަ
4) ކައުންސިލްގައި މަސައްކަތް ކުރާނެ ޖާގަ ނެތް ނަމަ 10 އިންސައްތަ
5) މުވައްޒަފުން މަސައްކަތް ކުރާނެ ޖާގަ ނެތް ނަމަ 10 އިންސައްތަ
6) އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް މަސައްކަތް ކުރާނެ ޖާގަ ނެތް ނަމަ 10 އިންސައްތަ
7) ކަންގަތި އެވޯޑް ހާސިލް ކޮށްފައި ވާނަމަ 10 އިންސައްތަ
މީގެ އިތުރުންވެސް މާކްސް ދޭނެ ގޮތުގެ އިތުރު ރުބްރިކެއްވެސް ހެދިފައިވާ ކަމަށާ، އެ ވެސް ފަހުން އާއްމު ކުރައްވާނެ ކަމަށް ޝަރީފް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
