ގޭބިސީތަކުގެ ބުޑުގަ ހުންނަ މިސްކިތްތަކުގައި، ރަނގަޅީ މިސްކިތުގެ އެތެރެއަށް އަޑު ހުންނަ ގޮތަށް ނަމާދުކުރުން ކަމަށް ރާއްޖޭގެ އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ކުރީގެ މަޖިލިސް މެމްބަރު މެމްބަރު އިބްރާހިމް އިސްމާއިލް އެކްސްގައި ޝަކުވާގެ ގޮތުގައި ކުރެއްވި ޕޯސްޓަކަށް ޖަވާބުދެއްވަމުންނެވެ.
"މިގޭދޮށު ގޭގޭގެ މީހުނަށް ޢިޝާނަމާދު ކޮށްލެވޭނީ މިސްކިތުން ތަރާވީޙް ނަމާދުކޮށް ނިމުނީމައެވެ. މިއީ ކޮންމެ ރޯދަމަހެއްގެވެސް ޙާލެވެ. ރީތިކޮށް ކިޔަވާނަމަވެސް ރަނގަޅެވެ."
އިބްރާހިމް އިސްމާއިލް ވިދާޅުވިއެވެ.
މީގެ ޖަވާބުގައި، ވަޒީރު ޝަހީމް ވިދާޅުވީ، ގޭބިސީތަކުގެ ބުޑުގަ ހުންނަ މިސްކިތްތަކުގައި އަޑުހަރުކޮށް ކިޔަވާ ނަމާދުތަކުގައްޔާއި ތަރާވީޙު ނަމާދާއި ދަމު ނަމާދުގައި، ރަނގަޅީ މިސްކިތުގެ އެތެރެއަށް އަޑު ހުންނަ ގޮތަަށް ކުރުން ކަމަށެވެ.
އަދި މީގެ އިތުރުންވެސް ވަޒީރު ޝަހީމް ވަނީ، ކުޑަކުދިން ނިދާ ގަޑިތަކުގައްޔާއި އުޒުރުވެރިން ގޭގައި ކުރާ ނަމާދުތަކަށް ދަތިނުވާނެހެން، އެފަދަ މިސްކިތްތަކުގައި ނަމާދުކުރުން ކުރިއަށް ގެންދިޔުމަށްވެސް އެދިލައްވާފައެވެ.
ގޭބިސީތަކުގެ ބުޑުގަ ހުންނަ މިސްކިތްތަކުގައި، އެތެރެއަށް އަޑު ހުންނަ ގޮތަށް ނަމާދުކުރި ނަމަވެސް، ބަންގިއާއި ގަމަތް ބޭރަށް ހުއްޓަސް އެންމެ ރަނގަޅު ކަމަށް ވަޒީރުގެ ޕޯސްޓްގައިވެއެވެ.
Advertisement
This content is created and paid for by advertisers and does not involve Voice Journalists
