ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނާއިރު ހުސްވެފައިވާ ގޮނޑިތައް ނުލައި ގުނާ ގޮތަށް މަޖިލީހުގެ ގަވާއިދަށް އިތުރު ކުރެވުނު މާއްދާ އުވާލުމަށް މަޖިލީހުގެ ރައީސް މުހައްމަދު އަސްލަމް ހުށަހަޅުއްވައިފިއެވެ. 

މަޖިލީހުގެ މެމްބަރެއްގެ ގޮނޑި ހުސްވުމުން ޖުމްލަ މެމްބަރުންގެ އަދަދު މާނަ ކުރާނެ ގޮތް ބަޔާންކޮށް މަޖިލީހުގެ ގަވައިދުގެ 49 ވަނަ މާއްދާއަށް ގެނައި އިސްލާހު ބާތިލު ކުރަން ބަންޑާރަނައިބުގެ އޮފީހުން ސުޕްރީމް ކޯޓަށް މައްސަލަ ހުށަހެޅުމުން، ސުޕްރީމް ކޯޓުން ގޮތެއް ނިންމުމުގެ ކުރިން އެ މާއްދާ ބާތިލުކޮށް، ހަމަ އެމާއްދާގައި ހިމެނޭ ކަންކަން ހިމަނައިގެން އިތުރު މާއްދާއެއް މަޖިލީހުގެ ގަވާއިދަށް ވަނީ މާއްދާއެއް އިތުރު ކޮށްފައެވެ.

ބަންޑާރަނައިބުގެ އޮފީހުން ހުށަހެޅި މައްސަލައިގައި ސުޕްރީމް ކޯޓުން މިދިޔަ މަހުގެ 29ގައި ނިންމާފައި ވަނީ މެމްބަރުންގެ ޖުމްލަ އަދަދު ގުނަން ވާނީ ހުސްވެފައިވާ ގޮނޑިތައް ވެސް ހިމަަނައިގެން ކަމަށާއި 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށެވެ.

އެހެންކަމުން މަޖިލީހުގެ މިއަދުގެ ޖަލްސާ ފަށްޓަވަމުން އަސްލަމް ވަނީ އެކަން ފާހަގަކުރައްވައި، މެމްބަރުންގެ އަދަދު ހުސްވި ގޮނޑިތައް ނުހިމެނޭ ގޮތަށް ގުނަން، ފަހުން މަޖިލީހުގެ ޤަވައިދުގެ 242 ގެ (1) ގެނައި ބަދަލުގައި ވަނީ ހަމަ ސުޕްރީމް ކޯޓުން ބާތިލު ކުރި 49 މާއްދާގައި ވެސް ބުނާ ވާހަތަކަށް ވާތީ އެ މާއްދާ އުނިކޮށްދެއްވުމަށް އެދި އަސްލަމް ތަޅުމަށް ހުށަހެޅުއްވިއެވެ.

އަސްލަމްގެ އެ ހުށަހެޅުއްވުމާއި ގުޅިގެން އެމްޑީޕީއާއި ޑިމޮކްރެޓްސްގެ ބައެއް މެމްބަރުން ވަނީ މަޖިލީހުން ފަހުން ގެނައި ބަދަލު ދެމި އޮންނާނެ ކަމަށާއި، މަޖިލީހުގެ ގަވާއިދަށް ފަހުން ގެނައި އިސްލަހާމެދު ސުޕްރީމް ކޯޓުން ގޮތެއް ނުނިންމާހާ ހިނދަކު އެއަށް އަމަލުކުރެވޭނެ ކަމަށް ބުނެ ވާހަކަ ދައްކައިފައެވެ.

އެގޮތުން އެމްޑީޕީގެ ޕާލިމަންޓު ގުރޫޕުގެ ލީޑަރު، އަދި އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) ވިދާޅުވީ، މަޖިލީހުގެ މެމްބަރުންގެ ޖުމްލަ އަދަދަކީ 87 ކަމަށް ބަލައިގެން މިއަދުގެ ކޯރަމް ގުނާފައިވާކަމަށް ރިޔާސަތުން އިއުލާނު ކުރުމުން އެ ވާހަކަ އަޑުއަހަން އުނދަގޫވިކަމަށެވެ. ވުޖޫދުގައި އޮތް މާއްދާއެއް، ނެތް މާއްދާއެއްކަމަށް ބަލައި ޖަލްސާ ފެއްޓެވުމުގައި އަސްލަމް އަމަލު ކުރެއްވި ގޮތަކީ އެންމެ ރަނގަޅު ގޮތެއް ނޫންކަމަށް އޭނާ ވިދާޅުވި އެވެ.