ރަމަޟާން މަހުގެ ވިތުރީގެ ޤުނޫތުގައި، ފަލަސްތީނުގެ ރައްޔިތުންނަށް ހެޔޮ ދުޢާކޮށްދިނުމަށް ދިވެހި ރާއްޖޭގެ އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު ޝަހީމް އަލީ ސައީދު އިލްތިމާސްކުރައްވައިފިއެވެ.

ވަޒީރު ޝަހީމް އެކްސްގައި ކުރެއްވި ޕޯސްޓެއްގައި ވަނީ ރަމަޟާންމަހުގެ ވިތުރީގެ ޤުނޫތުގައި ފަލަޞްޠީނުގެ ރައްޔިތުންނަށް ހެޔޮ ދުޢާކޮށްދިނުމަށް، އިމާމުވެ ތަރާވީޙުނަމާދާއި ދަމުނަމާދު ކުރައްވާ އިމާމުންނަށް އިލްތިމާސްކުރައްވާފައެވެ.

މީގެ ކުރިން، މިދިޔަ އަހަރުގެ އޮކްޓޫބަރު މަހުގައި ވެސް އިސްލާމީ ކަންތައްތަކާއި ބެހޭ ވުޒާރާއިން ވަނީ ފަލަސްތީނުގެ ރައްޔިތުންނަށް ރައްކާތެރިކަމާއި ސަލާމަތްކަން ދެއްވުން އެދި މާތް الله ގެ ހަޟުރަތުގައި ދެންނެވުމަށް ކޮންމެ ނަމާދެއްގައިވެސް ގުނޫތު ކިޔަން އަންގާފައެވެ.

ނަމަވެސް، މީގެ ކުރިން ވަޒީރު ޝަހީމް ވަނީ އަހަރެމެންގެ ލޮބުވެތި ރަސޫލާ މުހައްމަދު ޞައްލައްالله ޢަލައިހި ވަސައްލަމް، މުޞީބާތުގެ ވަގުތުގައި ޤުނޫތުއްނާޒިލާ 1 މަސް ވަންދެން ކިޔުއްވުމަށް ފަހު ދޫކޮށްލެއްވި ކަމަށް ވިދާޅުވެފައެވެ.