ސަރުކާރުން ހަދިޔާ ކުރި ކާޑުގެ ބާވަތްތައް ދެން ހަމައެކަނި ރޭގަނޑު ދޫކުރާގޮތަށް މާލެ ސިޓީ ކައުންސިލުން ހަމަޖައްސައިފިއެވެ.

މާލެ ސިޓީ ކައުންސިލުން ބުނީ، މީގެ ކުރިން ދުވާލާއި ރޭނގަނޑު ކާޑު ދޫކުރި ނަމަވެސް، ދެން ކާޑޫ ދޫކުރުމަށް ހަމަޖެހިފައިވަނީ ރޭގަނޑު 09:00ން 12:00ށް އެކަނި ކަމަށެވެ.

ކާޑު ދޫކުރުމަށް އެ ކައުންސިލުން ވަނީ ވަކި ޕޮއިންޓް ތަކެއް ވެސް ކަނޑައަޅާފައެވެ. މިގޮތުން ކާޑު ދޫކުރާ ޕޮއިންޓްތަކަކީ:

Advertisement

1. މާލޭ ގަލޮޅު ދަނޑު

2. މާލޭ ސިޓީ ކައުންސިލުގެ އާންމު ހިދުމަތްތަކާއި ބެހޭބައި

3. މާލޭ ސޯޝަލް ސެންޓަރ

4. ވިލިމާލޭ ބިއްރި މިސްކިތް ހޯލް

5. ހުޅުމާލޭ ފޭސް 1 ގެ އުމަރު ޒާހިރު ބިލްޑިންގ

6. ހުޅުމާލޭ ފޭސް 2 ގެ ހިޔާ ފްލެޓް ޓަވަރ 10 ޔޫތް ސެންޓަރ

މާލެ ސިޓީ ކައުންސިލުން ބުނީ، ހަދިޔާ ބަލައި އަންނަންވާނީ ދިވެހި ރައްޔިތެއް ކަމަށާއި، ދޫކުރާނީ ކަރަންޓް މީޓަރުގެ ނަންބަރ އަށް ބެލުމަށްފަހު ކަމަށެވެ. ހަނޑޫ އަދި ފުށް ބަލާ އަންނަ ފަރާތުގެ ދިވެހި ރައްޔިތެއްކަން އަންގައިދޭ އައިޑީ ކާޑް ،ނުވަތަ ލައިސަންސް ނުވަތަ ޕާސްޕޯޓް ގެންނަންވާނެ ކަމަށް ވެސް އެއިދާރާއިން ވަނީ ބުނެފައެވެ.

މީހުން ދިރިއުޅޭ ކޮންމެ ގޭބިސީއަކަށް ރޯދަމަހު 10 ކިލޯގެ ފުށް ބަސްތާއަކާއި ހަނޑޫ ބަސްތާއެއް ދިނުމަށް ސަރުކާރުން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވަނީ ޗައިނާއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށްފަހު މާލެ ވަޑައިގެން ދެއްކެވި ވާހަކަފުޅުގައެވެ. އެގޮތުން ރައީސް ޑރ.މުއިއްޒު ވިދާޅުވީ، މީހުން ދިރިއުޅޭ ކޮންމެ ގޭބިސީއަކަށް 10 ކިލޯ ހަނޑުލާއި 10 ކިލޯ ފުށް ދިނުމަށް މިއަހަރު ސަރުކާރުން ނިންމާފައިވީ ނަމަވެސް އަންނަ އަހަރު އެ އަދަދު އިތުރު ކުރައްވާނެ ކަމަށެވެ.