މާލޭގައި މަގުމަތީގައި ކުނި ބެހެއްޓި މީހަކު ފުލުހުންގެ އެހީތެރިކަމާއެކު މާލެ ސިޓީ ކައުންސިލުން ހޯދައިގެން ޖޫރިމަނާކޮށްފިއެވެ.

މާލެސިޓީ ކައުންސިލުން ބުނީ އެ މީހާ ހޯދާފައިވަނީ މާފަންނު ވިލީ ފުލުހާއި ކައުންސިލްގެ ކޮމިއުނިޓީ އެންގޭޖުމެންޓު ޔުނިޓާއި ގުޅިގެންނެވެ. އަދި އޭނާ ފުލުހަށް ހާޒިރުކޮށް ޖޫރިމަނާކޮށްފައިވާ ކަމަށެވެ.

މާލެ ސިޓީ ކައުންސިލުން ހާމަކޮށްފައިވާ ގޮތުން ފެބްރުއަރީ މަހުން ފެށިގެން މިހާތަނަށް މަގު މަތީގައި ކުނި ބެހެއްޓި 100 މީހަކަށް އެ ކައުންސިލުން ވަނީ ފިޔަވަޅު އަޅާފައެވެ. މަގުމަތީގައި ގަވައިދާ ހިލާފަށް ކުނި ބަހައްޓާ ނަމަ ޖޫރިމަނާ ކުރަނީ 500 ރުފިޔާއިންނެވެ.

Advertisement

ތޯދައާއި ދިމާކޮށް ގޭގެ ސާފުކޮށްލުމާއިއެކު މާލޭގެ މަގުމަތައް ކުނި ގޮނޑަކަށް ވެގެންދިޔައެވެ. އެ ކުނިތައް ސާފުކުރުމުގެ މަސައްކަތް މާލެސިޓިީ ކައުންސިލުން ކޮށްފައިވާއިރު އިހަށް ރޭގައި ވެސް އަލަމާ ގޯޅި ސާފުކޮށް އެތަނުގައި ހުރި ކުނިތައް އެ ކައުންސިލުން ވަނީ ނަގާފައެވެ. އެހެން ނަމަވެސް އިއްޔެ ހެނދުނު އަނެއްކާ ވެސް އެތަނަށް ބަޔަކު ކުނި ޖަމާކޮށްފައިވާ ކަމަށް ކައުންސިލުން ބުނެފައިވެއެވެ.

މޭޔަރު އާދަމް އާޒިމް ރޭ ވިދާޅުވެފައިވާ ގޮތުގައި، 18 ދުވަހުގެ ތެރޭގައި މާލެއިން 305.65 ޓަނުގެ ކުނި ނަގާފައިވާ ކަމަށާ އިއްޔެ އެކަނިވެސް 42.15 ޓަނުގެ ކުނި ނަގާފައިވާ ކަމަށެވެ.