މިދިޔަ އަހަރު ނިމުނު އިރު އެންޓި ކޮރަޕްޝަން ކޮމިޝަން (އޭސީސީ) އިން ޖުމްލަ 358 މައްސަލަ ނިންމާފައިވާކަން އެ ކޮމިޝަނުގެ އަހަރީ ރިޕޯޓުން ހާމަވެއްޖެއެވެ.

އޭސީސީ ގެ އަހަރީ ރިޕޯޓް އާއްމުކޮށްފައިވާއިރު، ރިޕޯޓުން ދައްކާ ގޮތުގައި އެ ކޮމިޝަނަށް 2023 ވަނަ އަހަރު 1,151 ޝަކުވާ ހުށައެޅިފައިވާއިރު، 742 މައްސަލަ އެއް ވަނީ ރަޖިސްޓްރީ ކޮށްފައެވެ. އަދި ކޮމިޝަނުން އިސްނަގައިގެން ބަލަން 16 މައްސަލަ އެއް ކަނޑައެޅި އިރު، 365 މައްސަލައެއްގައި ވަނީ ޕްރިލިމިނަރީ މަރުހަލާގައި ގޮތް ނިންމާފައެވެ.

ހަމައެއާއިއެކު، ވޭތުވެދިޔަ އަހަރުގެ ތެރޭގައި، އޭސީސީން 220 މައްސަލަ އެއް ތަހުގީގު މަރުހަލާއިން ނިންމި އިރު، އަހަރު ނިމުނު އިރު ބާކީ  ޕްރިލިމިނަރީ ތަހުގީގު މަރުހަލާގައި 786 މައްސަލައެއް ނުނިމި އޮތެވެ.

އެ ކޮމިޝަނަށް ހުށައެޅުނު މައްސަލަ ތަކުގެ ތެރެއިން ތަހުގީގު މަރުހަލާގައި ބާކީ ނުނިމި 999 މައްސަލަ އެއް އޮތް އިރު، 358 މައްސަލަ ނިންމާ، އިދާރާތަކަށް އިސްލާހު ކުރުމަށް 39 އެންގުން ވަނީ ފޮނުވާފައެވެ.

މީގެ އިތުރުންވެސް، އޭސީސީގެ އަހަރީ ރިޕޯޓް ދައްކާގޮތުގައި، އެ ކޮމިޝަނުން ދައުލަތަށް 74،159،720.53 ރުފިޔާ ހޯދައިދޭން ނިންމާފައިވާއިރު، މިދިޔަ އަހަރުގެ ތެރޭގައި 234،531.57 ރުފިޔާ ވަނީ ދައުލަތަށް ހޯދައިދީފައެވެ.

އޭސީސީން ބުނީ 2023 ވަނަ އަހަރަކީ ޖުމްލަ ގޮތެއްގައި އެ ކޮމިޝަނަށް ކާމިޔާބު އަހަރެއް ކަމަށާއި، އޭގެ ތެރޭގައި 2023 ވަނަ އަހަރު އާންމުން ކޮރަޕްޝަނާއި މެދު ދެކޭ ގޮތް ބެލުމަށް ކުރެވުނު ދިރާސާ ހިމެނޭ ކަމަށެވެ. އަދި މި ދިރާސާގެ އަލީގައި، ކޮރަޕްޝަން ހުއްޓުވުމާއި، ކޮރަޕްޝަން ހިނގުމަށް މަގުފަހިވާ ކަންކަން ވެސް ހުއްޓުވައި، މަސައްކަތްތައް ތަރުތީބު ކުރެވޭނެ ކަމަށް އޭސީސީން ބުނެއެވެ. މީގެ އިތުރުންވެސް، ފާއިތުވެދިޔަ އަހަރު، އޭސީސީ ގެ ތަހުގީގުތައް އަވަސްކޮށް، ފެންވަރުމަތި ކުރުމަށް އިޖުރާއީ ބަދަލު ތަކެއް ވެސް ގެނެވުނު ކަމަށް އެ ކޮމިޝަނުން މައުލޫމާތު ދެއެވެ.