ބަލި މީހުން އުފުލުމަށް، އެއާ އެމްބިއުލަންސްގެ ގޮތުގައި ބޭނުންކުރާނެ ސީޕްލޭންގެ ފޮޓޯ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއްމުކުރައްވައިފިއެވެ.
އެއާ އެމްބިއުލަންސް ގެ ގޮތުގައި ބޭނުންކުރުމަށް ހަމަޖެހިފައިވާ ސީޕްލޭން ގެ ފޮޓޯ ރައީސް ޑރ.މުއިއްޒު އާއްމުކުރައްވާފައި ވަނީ އެމަނިކުފާނު އެކްސް ގައި ކުރެއްވި ޕޯސްޓެއްގައެވެ.
ރައީސް ޑރ.މުއިއްޒު އަތޮޅު ތެރެއަށް ކުރެއްވި ދަތުރުފުޅު ތަކުގައި، ނ.މަނަދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވަމުން ދެއްކެވި ވާހަކަފުޅުގައި އެމަނިކުފާނު ވަނީ އެއާ އެމްބިއުލެންސް އެއްގެ ގޮތުގައި ސީޕްލޭނެއް ވެސް އެތެރެ ބަދަލުކޮށްގެން ބޭނުން ކުރަން ފަށާނެ ކަމަށް ވިދާޅުވެފައެވެ. އަދި ސީޕްލޭން ދުއްވާނީ ދުވާލު ގަޑީގައި ކަމަށާއި، ސީޕްލޭން ގެ ސަބަބުން ކޮންމެ ރަށެއް ކައިރިއަށް ވެސް ކުއްލި ހާލަތުގައި ކައިރިކުރުމުގެ ފަސޭހަކަން ލިބިގެން ދާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސް ޑރ.މުއިއްޒު ގެ ވައުދުފުޅާއި އެއްގޮތަށް ރާއްޖޭގައި އެއާ އެމްބިއުލަންސް ގެ ހިދުމަތް ފެށީ، މި މަހުގެ 1 ވަނަ ދުވަހުއެވެ.
މި ހިދުމަތަށް މިހާރު ބޭނުން ކުރަމުން އަންނަ ބޯޓަކީ މޯލްޑިވިއަން ގެ ޑޭޝް 8 ގެ މަތިންދާ ބޯޓެކެވެ. ބަލި މީހުން އުފުލޭގޮތަށް ބޯޓުގެ އެތެރެއަށް ބަދަލު ގެނެސްފައިވާއިރު މި ބޯޓުން އެއްފަހަރާ ދެ ބަލިމީހުން ވެސް އުފުލެއެވެ. އަދި އެ ބޯޓުގައި ލަންކާ އާއި ހިސާބަށް ވެސް ބަލި މީހުން އުފުލޭނެ ކަމަށާއި، ލަންކާ އަށް މަޑުކުރުމަށްފަހު ތެޔޮ އަޅައިގެން އަދި އެއަށްވުރެ ދުރަށް ވެސް ދެވޭނެ ކަމަށް ރައީސް ޑރ.މުއިއްޒު ވަނީ މީގެ ކުރިން ވިދާޅުވެފައެވެ.
ރައީސް ޑރ.މުއިއްޒު ވަނީ އެއާ އެމްބިއުލެންސް ގެ ހިދުމަތާއި އެކު އޭރުން އޮންނާނީ މޯލްޑިވިއަން އިން އޮޕަރޭޓް ކުރާ ދިވެހި ރާއްޖޭގެ އަމިއްލަ ބޯޓެއް ކަމަށާއި ރާއްޖޭގެ ކޮންމެ އެއާޕޯޓަކުން ވެސް ކުއްލި ހާލަތުގައި ބަލި މީހުން، އެ ބޯޓު މެދުވެރިކޮށް ގެންދެވޭނެ ކަމަށް ވިދާޅުވެފައެވެ. އަދި އެއާ އެމްބިއުލެންސް ގެ ހިދުމަތާއި އެކު ، ރާއްޖޭގެ ކޮންމެ ކަންކޮޅަކުންވެސް ކޮންމެ ރަށަކުންވެސް، މެޑިކަލް އިވެކިއުއޭޝަނެއް ހަދަން ޖެހިއްޖެ ހާލަތެއްގައި، އެކަން ކުރުމުގެ ގާބިލުކަން ފަހިވެގެންދާނެ ކަމަށްވެސް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
