ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަކީ ދިވެހި ރާއްޖޭގެ ތާރީހު ބަދަލުކޮށްލާނެ މޮޅު ލީޑަރެއް ކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.
އެމްއެންޑީއެފްގެ އެއާކޯގެ ހިދުމަތް އިފްތިތާހު ކުރުމާ ގުޅިގެން ވަޒީރު ފައިސަލް ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ.މުއިއްޒު ވެރިކަމަށް ވަޑައިގެންނެވީ، ބޮޑެތި ވައުދުތަކާއި އެކު ކަމަށާއި، ކޮންމެ ވައުދެއްވެސް ވީ އެ ވައުދެއް ފުއްދާނެ ކަމުގެ އިޚްލާސްތެރި ހެޔޮ ނިޔަތުގައި ކަމަށެވެ. ރައީސް ޑރ.މުއިއްޒު ވެރިކަމަށް ވަޑައިގެން ފުރަތަމަ ދުވަހުން ފެށިގެން ކުރައްވަނީ ވައުދުތައް ފުއްދުމުގެ މަސައްކަތްކަމަށް ވެސް ވަޒީރު ވިދާޅުވިއެވެ.
"ރައީސް ޑރ.މުއިއްޒު އަކީ ދިވެހި ރާއްޖޭގެ ތާރީހު ބަދަލުކޮށްލާނެ މޮޅު ލީޑަރެއް. ވެރިކަމަށް ވަޑައިގެންނެވީ ބޮޑެތި ވައުދުތަކާއި އެކު ކޮންމެ ވައުދެއްވެސް ވީ އެ ވައުދެއް ފުއްދާނެ ކަމުގެ އިޚްލާސްތެރި ހެޔޮ ނިޔަތުގައި. ވެރިކަމުގެ ފުރަތަމަ ދުވަހުން ފެށިގެން ވެސް އެ ކުރައްވަނީ ވައުދު ފުއްދުމުގެ މަސައްކަތް."
ވަޒީރު ފައިސަލް ވިދާޅުވިއެވެ.
މީގެ އިތުރުންވެސް ފައިސަލް ވިދާޅުވީ، ރައްޔިތުންނަށް ހެޔޮވެރިކަމެއް ކޮށްދީ ފުދުންތެރި ރައްޔިތުން ދިރިއުޅޭ ދިވެހިވަންތަ ދިވެހީންގެ ދިވެހި ރާއްޖެ އެއް ހޯދައިދިނުމަކީ ރައީސް ޑރ.މުއިއްޒުގެ އަމާޒު ކަމަށެވެ.
ރޭގައި ދިވެހި ރާއްޖޭގެ ދިފާއީ ބާރު ގެ އެމްއެންޑީއެފް އެއާކޯ އާއި އެކު ރާއްޖޭގެ ސަރަހައްދު ބެލެހެއްޓުމަށްޓަކައި ޒަމާނީ ޑްރޯންތަކެއް އިފްތިތާޙް ކޮށްދެއްވާފައިވަނީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ރައީސް ޑރ.މުހައްމަދު މުއިއްޒު އެވެ.
ރޭ އިފްތިތާހް ކުރެވިގެން ދިޔަ ދިވެހި ސިފައިންގެ ވައިގެ ބާރު "އެމް.އެން.ޑީ.އެފް އެއަރ ކޯރ" އުފެދުމާއެކު، ވައިގެ ސަލާމަތީ ކަންކަން ބަލަހައްޓާ ސިފައިންގެ ބާރުގެ ޚިދުމަތަށް އެންމެ ފުރަތަމަ އަންމޭންޑް އޭރިއަލް ކޮމްބެޓް ވެހިކަލް (ޔޫ.އޭ.ވީ) ނެރުނު ނަމަވެސް ސަރުކާރުގެ އަމާޒަކީ މޭންޑް އަދި އަންމޭންޑް ސިސްޓަމްތައް ސިފައިންގެ ޚިދުމަތަށް ތަޢާރަފްކޮށް، ސިފައިންގެ ވައިގެ ޚިދުމަތް ދައުލަތުގެ ފުދުންތެރިކަން ތަންދޭ މިންވަރަކުން ތަރައްޤީކުރަމުން ގެންދިއުން ކަމަށް އެމްއެންޑީއެފުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
