"ޖަޒީރާ" ޓެލެގްރާމް ގްރޫޕުގައި 7000 މިހުން ތިބިކަމަށާއި ހަށިވިއްކުން ޕްރޮމޯޓްކޮށް އެކަން ކުރަން ހާއްސަ ޓެކްސީއެއް ގެންގުޅުންކަމަށް ފުލުން ބޭއްވި ޕްރެސް ކޮންފަރެންސްގައި ބުނެފިއެވެ.

މިދިޔަ އަހަރު އޭޕްރިލް މަހުން ފެށިގެން، ބޮޑެތި ކުށްތަކަށް އަރައިގަތުމަށް "ޖަޒީރާ އެޑްމިން"، "ޖަޒީރާ ސްކޭމް އެލާޓް"، "ޖަޒީރާ އެސްކޯޓް ގެލެރީ"، "ޖަޒީރާ ލިންކް ހަބަރު" އަދި "ޖަޒީރާ ގްލާސް"ގެ ނަމުގައި ހިނގަމުން ގެންދިޔަ ޓެލެގްރާމް ޗެނަލްތަކުގެ މައްސަަލަ މި މަހު 6 ވަނަ ދުވަހު ތަހުގީގުކޮށް 2 މީހަކު ވަނީ ފުލުހުންގެ ބެލުމުގެ ދަށަށް ގެނެސްފައެވެ.

މިކަމުގައި ތުހުމަތު ކުރެވޭ 4 ތަނެއް ފުލުން ބަލާ ފާސްކޮށް، ހައްޔަރު ކޮއްފައި ވަނީ އުމުރުން 28 އަހަރުގެ ދިވެހި ފިރިހެނަކާއި، އުމުރުން 39 އަހަރުގެ ދިވެހި އަންހެނެށްކަމަށާއި، ހައްޔަރު ކުރެވުނު 2 މީހުން ތެރެއިން އެކަކަކީ މީގެ ކުރިން ގިނަ އަދަދެއްގެ ކުށުގެ ރެކޯޑް ކުރެވިފައިވާ މީހެއްކަމަށް މި ނޫސްވެރިންގެ ބައްދަލުވުމުގައި ފުލުހުން ވަނީ ބުނެފައެވެ.

މި ޗެނަލްގައި ދުވާލުގަޑީ ހަށިވިއްކުމާއި، މަސްތުވާތަކެެއްޗާއި، ސެކްސް ޓޯއީސް، ޕޯލްސް ޑޮކިއުމަންޓާއި، މި ކަންކަމަށް މަގުފަހި ކުރުމަށް ޕޯސްޓަރތައް ހަދާއި އިޝްތިހާރު ކޮއްފައިވާކަމަށް އިންވެސްޓިގޭޝަން އޮފިސަރ އައިމިނަތު މުހައްމަދު ވިދާޅުވިއެވެ.

ފުލުހުން ދިން ޕްރެސް ކޮންފަރެންސްގައި އިންވެސްޓިގޭޝަން އޮފިސަރ އައިމިނަތް މުހައްމަދު ވާހަކަ ދައްކަނީ

މާލެ ސަރަހައްދުގައި ހަށިވިއްކުމުގެ ކަންކަން ކުރަނީ ޓެކްސީ ޑްރައިވަރަކާއި ގުޅިގެން ކަމަށާއި ވަކި ހާއްސަ ޓެކްސީއެއް އެކަމަށް ގެންގުޅޭ ކަމަށް ވެސް ފުލުހުން ބުންޏެވެ.

ހަށިވިއްކުމަށް ބޭނުން ކުރާ ޓެކްސީ އަކީ މާލެ ތެރޭ އާންމުކޮށް ދަތުރުތައްކޮށް އުޅޭ ޓެކްސީއެއް ކަމަށާއި އެހެންނަމަވެސް މި ޓޭކްސީ އަކީ މި މައްސަލާއިގާ ތުހުމަތު ކުރެވޭ މީހުން ބޭނުން ކުރާ ޓެކްސީ ކަމަށާއި މި ކަން ކުރަމުން ދަނީ ޓެކްސީ ޑްރައިވަރާ ވެސް ގުޅިގެން ކަމަށް ފުލުހުން މި ނޫސްވެރިންގެ ބައްދަލުވުމުގައި ފާހަގަ ކުރިއެވެ.

ހަށިވިއްކުމުގެ މައްސަލާއިގާ ހައްޔަރު ކުރެވުނު 2 މީހުންނަކީ އާމްދަނީ ހޯދުމަށް އެއްވެސް މަސައްކަތެއް ކުރާ ބައެއް ނޫން ކަމަށާއި ނަމަވެސް ބޮޑެތި އަދަދުތަކުން ފައިސާގެ ޓްރާންސެކްޝަންތައް ހަދާފައި ވާކަމަށާއި ތުހުމަތު ކުރެވޭ ފަރާތްތަކުގެ އެކައުންޓުން، އެކެއްގެ އެކައުންޓުން އަނެކެއްގެ އެކައުންޓަށް ގިނަ އަދަދެއްގެ ފައިސާ ޓަރާންސްފާ ކޮއްފައި ވާކަމަށް ފުލުހުން މި ޕްރެސް ކޮންފަރެންސްގައި ބުންޏެވެ.

ފުލުހުން ބުނި ގޮތުގައި އެމީހުން މައްޗަށް ޑްރަގް ޓްރެފިކިން އާއި ހަށިވިއްކުމާއި މަނީ ލޯންޑަރިން އާއި ހަށިވިއްކުން ޕްރޮމޯޓް ކުރުމާއި އޮރިޔާން ކާޑު އުފެއްދުމާއި ބެހުމުގެ އިތުރުން ފޭކު ޑޮކިއުމަންޓާއި ހޮސްޕިޓަލް ތަކުގެ ނަމުމުގައި ފޭކު އެމްސީ ހައްދައިދިނުމުގެ މައްސަލައަށް ތުހުމަތު ކުރެއެވެ.