އިންޓަނޭޝަނަލް އެއިޑް ކެމްޕެއިން (އައިއޭސީ) އިން ދިވެހިންގެ އެހީގައި، ޔަމަންގައި 1،600،000 ލީޓަރުގެ ސާފު ފެން ބަހަން ފަށައިފިއެވެ.

ޔަމަނަކީ މުޅި ދުނިޔޭގައިވެސް ފެނުގެ ދަތިކަން އެންމެ ބޮޑު އެއް ޤައުމުކަމަށްވާއިރު އައިއޭސީން ބުނީ، އެގައުމުގެ ރައްޔިތުން ސާފު ބޯފެނާ ނުލާ އުޅޭތާ އެތަކެއް އަހަރުތަކެއް ވެއްޖެ ކަމަށެވެ. 

އެގޮތުން ޔަމަނުގެ އާބާދީގެ ދެބައިކުޅަ އެއްބަޔަކީ އެކަށީގެންވާ ފެން ނުލިބޭ މީހުންކަން ފާހަގަކޮށް، އައިއޭސީން ބުނީ، އެ ޖަމިއްޔާގެ ލޯތްބާއިއެކު ކެމްޕެއިންގެ ތެރެއިން ދިވެހިންގެ އެހީގައި ޔަމަންގައި 1،600،000 ލީޓަރުގެ ސާފު ފެން ބެހުމުގެ މަސައްކަތް ކުރަމުން އަންނަ ކަމަށެވެ.

މިއީ ޔަމަނުގެ ރައްޔިތުންނަށް ދެވިގެންދާ ވަރަަށް ބޮޑު އެހީއެއްކަން ފާހަގަކުރަމުން އައިއޭސީން ބުނީ  ޔަމަނުގައި ދެމެހެއްޓިނިވި ގޮތެއްގައި ފެން ފޯރުކޮށްދިނުމަށް ފެނުގެ ވިއުގައެއް ބިނާކުރުމުގެ މަސައްކަތް ކުރަމުން އަންނަ ކަމަށާއި އެހީތެރިވާން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.

މިގޮތުން މި ޕްރޮޖެކްޓް ގެ އެހީގައި 1,160 އަށްވުރެ ގިނަ އާއިލާތަކަށް ސާފު ބޯފެން ފޯރުކޮށް ދެވިގެންދާއިރު، އެހީތެރިވާން ބޭނުންވާ ފަރާތްތަކަށް އައިއޭސީގެ ވެބްސައިޓް މެދުވެރިކޮށް އެ ފުރުސަތު ވަނީ ހުޅުވާލާފައެވެ.