މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ޗީފް އެގްޒެކެޓިވް އޮފިސަރު, އަހްމަދު ޝަމާހު ރަޝީދު ވަގުތީ ގޮތުން މަގާމުގެ މަސްއޫލިއްޔަތުތަކުން ދުރުކޮށްފި އެވެ.
މިކަމާއި ގުޅިގެން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން މިއަދު ނެރުނު ބަޔާނެއްގައި ބުނީ ޝަމާހު އާއި ގުޅޭ ގޮތުން، ކޯޕަރޭޓް ގަވަނެންސްއާއި ގުޅުން ހުރި މައްސަލަތަކެއް ޕީސީބީ އަށް ހުށައެޅިފައިވާ ކަމަށެވެ.
އެހެންކަމުން އެކަމާއި ގުޅުން ހުރި ފުރިހަމަ އިންކުއަރީއެއް ހިންގުމަށްޓަކައި، "ސަރުކާރު ހިއްސާވާ ކުންފުނި ތަކުގެ ޑިރެކްޓަރުންގެ ސުލޫކީ މިންގަނޑާއި، ޝަކުވާ ހުށައެޅުމާއި އަދި ފިޔަވަޅު އެޅުމާއި ގުޅޭ އުސޫލު" ގެ ދަށުން މިއަދުން ފެށިގެން 14 ދުވަހުގެ މުއްދަތަކަށް މަގާމުގެ މަސްއޫލިއްޔަތުން ވަގުތީ ގޮތުން އެކަހެރިކޮށްފައިވާ ކަމަށް ޕީސީބީ އިން ނެރުނު ބަޔާނުގައި ވެއެވެ.
މިފްކޯގެ ސީއީއޯ ޝަމާހު އަށް ޕީސީބީ އިން މި ފިޔަވަޅުތައް އަޅާފައިވާއިރު، މިފްކޯގެ ވަޞީލަތްތައް ސިޔާސީ ކަންކަމުގައި ބޭނުންކުރަމުންދާކަމަށް ބަޔާންކޮށް ހުށައަޅާފައިވާ މައްސަލައާއި ގުޅިގެން، މިފްކޯގެ ބޭފުޅުންނާއި ޕީސީބީ ބޯޑުގެ ބޭފުޅުންނާއި މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީއިން ބައްދަލުކޮށްފައިވާކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
