ނިމިދިޔަ ސަރުކާރުގައި އެޑިޔުކޭޝަން މިނިސްޓްރީން އިތުުރު ހަރަކާތްތައް ކުރިއަށް ގެންގޮސްފައިވަނީ ޓީޗަރުންގެ ނަފްސާނީ ދުޅަހެޔޮ ކަމަށް އަސަރު ކުރުވައި، ޓީޗަރުން މުޅިން ވަރުބަލި ކޮށްލާ އުސޫލުން ކަމަށް ތަޢުލީމާއި ބެހޭ ވަޒީރު ޑރ. އިސްމާއީލް ޝަފީޢު ވިދާޅުވެއްޖެއެވެ. 

ވަޒީރު ޝަފީއު މިހެން ވިދާޅުވެފައިވަނީ ދިރާސީ އައު އަހަރު ޖަނަވަރީ މަހުގައި ފެށުމަށް މިސަރުކާރުން ނިންމެވި ނިންމެވުމާއި ގުޅޭގޮތުން މިއަދުގެ ރައްޔިތުންގެ މަޖިލީހުގެ ޖަލްސާގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ކުރެއްވި ސުވާލަށް ޖަވާބު ދެއްވަމުންނެވެ. 

ޑރ. ޝަފީއު ވިދާޅުވީ ކުރީ ސަރުކާރުން ދިރާސީ އައު އަހަރު، އަހަރުގެ މެދު ތެރެއިން ފެށުމަށް ނިންމެވި ނިންމުން ބަދަލުކޮށް އަލުން ޖަނަވަރީ މަހުގައި ދިރާސީ އަހަރު ފަށަން ނިންމެވުމުގެ ކުރިން، ކުރީ ސަރުކާރުގެ ނިންމެވުމުގެ ސަބަބުން ބޮޑަށް ލިބެނީ ގެއްލުންތޯ ނުވަތަ ފައިދާތޯ ބައްލަވާފައިވާނެ ކަމަށެވެ.

Advertisement

މިއާއެކު ވަޒީރު ވިދާޅުވީ، ކުރީ ސަރުކާރުން އެ ބަދަލު ގެނެސްފައި އޮތްގޮތާ ގުޅޭގޮތުން ބެލި ބެލުމުން އެ ބަދަލު ގެނައުމާ ގުޅޭގޮތުން 30،000 މީހުންގެ ހިޔާލު ހޯދިކަން އެނގެން އޮތް ކަމަށެވެ.

އެހެންނަމަވެސް، ކުރީ ސަރުކާރުން ދިރާސީ އަހަރަށް ބަދަލު ގެނައީ ހިޔާލު ހޯދި 30،000 މީހުންގެ ތެރެއިން 70 އިންސައްތައެއްހާ މީހުންގެ ހިޔާލާ ދެކޮޅަށް ކަމަށް ވަޒީރު ވިދާޅުވިއެވެ. އެއީ، ދަރިވަރުންނާއި ބެލެނިވެރިން ވެސް ބޭނުންވާ ގޮތް ނޫން ކަމަށް އޭނާ ވިދާޅުވިއެެވެ.

މީގެ އިތުރުން. ވަޒީރު ވިދާޅުވީ، އެކެޑެމިކް ކަލަންޑަރަށް ގެނައި ބަދަލާއި އެކު، ދަރިވަރުންގެ ހަށިހެޔޮ ކަމާއި ދުޅަހެޔޮކަމަށް ރާވައި ހިންގާ ހަރަކާތްތަކަށް ވާނެ ގޮތާއި މެދު ބައެއް ފަރާތްތަކުން ސުވާލު އުފެއްދެވި ކަމަށެވެ. 

ވަޒީރު އިތުރަށް ވިދާޅުވީ، އެކަޑެމިކް ކަލަންޑަރަށް ގެންނަ ބަދަލާއި އެކީގައިވެސް، ދަރިވަރުންނަށް ދާޭންޖެހޭ ހަށިހެޔޮ ކަމާއި ދުޅަހެޔޮކަން ދިނުމާއި އެކީ، ޓިޗަރުންގެ ނަފްސާނީ ދުޅަހެޔޮކަމާއި، ޖިސްމާނީ ދުޅަހެޔޮކަމަށްޓަކައި ނަގަންޖެހޭ ފިޔަވަޅުތައް ނަންގަވާނެ ކަމަށެވެ. 

އެގޮތުން، ދަރިވަރުންގެ އިތުރު ހަރަކާތްތައް ބޮޑަށް ރާވާލައިގެން ކުރިއަށް ގެންދަވާނެ ކަމަށް ވިދާޅުވިއެވެ.