ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާއާ ގުޅިގެން ދިފާއީ ވުޒާރާއަށް ލިބިފައިވާ އިތުރު މައުލޫމާތު އެ ވުޒާރާއިން ހޯދުމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމްގެ އަރިހުން އެދިވަޑައިގެންފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ދިފާއީ ވަޒީރު ޣައްސާން ހާޒިރު ކޮށް ސުވާލު ކުރުމަށް ހުޅުވާލި ފުރުސަތުގައި މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަނީ މަޖިލީހުގެ ނަޝީދަށް އަމާޒުކޮށް ދިން ޙަމަލާއަށް ތިން އަހަރު ފާއިތު ވެގެން ގޮސްފައިވާއިރު، އެ މައްސަލަ ކޮޅެއްގައި ނުޖެހި ނުވާ ކަމަކަށް ވެގެންދާކަން ފާހަގަކުރައްވާފައެވެ.
އެހެންކަމުން، މި ސަރުކާރުން އެ މައްސަލައިގެ ފުން މިނަށް ބެލުމުގެ މަސައްކަތް ކޮށްދެއްވާނެ ކަމުގެ ޔަޤީންކަން ދެވިދާނެތޯ އޭނާ ވަނީ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ޣައްސާން ވަނީ، ޤައުމީ ދިފާއީ ބާރަށް ޤާނޫނީ ގޮތުން ރައްކާތެރިކަން ފޯރުކޮށްދޭން ޖެހޭ ހުރިހާ ފަރާތްތަކަށް އެ ރައްކާތެރިކަން ފޯރުކޮށްދެމުންދާނެ ކަމުގެ ޔަގީންކަން ދިވެހި ރައްޔިތުންނަށް އަރުއްވާފައެވެ.
މިއާއެކު ޣައްސާން ވިދާޅުވީ، ނަޝީދަށް ދެވުނު ހަމަލާގެ މައްސަލަ ވަރަށް ގާތުން ބައްލަވަމުން ގެންދަވާނެ ކަމަށާ، މައްސަލައާއި ގުޅޭ އިތުރު މައުލޫމާތު ހިއްސާކުރައްވަން އެބަހުރި ކަމަށެވެ.
ތި ވިދާޅުވި މައްސަލަ އަޅުގަނޑުމެން ވަރަށް ގާތުން ބަލަމުން ގެންދާނަން، އަޅުގަނޑަށް މިހާރު ފެނިފައި ހުރި ކަންތައްތަކުގައި ބައެއް މައުލޫމާތު ހަގީގަތުގައި މި މަޖިލީހަށް އިތުރަށް ހިއްސާކުރަން ދިފާއީ ވުޒާރާގައި އެބަހުރި، އެހެން ނަމަވެސް އެ މައުލޫމާތު އަޅުގަނޑުމެންނަށް ހިއްސާ ކުރެވޭނީ ތި ބޭފުޅުން އެ މައުލޫމާތު ހޯދަން އުޅުނީމަ
ޑިފެންސް މިނިސްޓަރު ޣައްސާން މަޢުމޫން
ޑިފެންސް މިނިސްޓަރުގެ އެވާހަކަފުޅާއި ގުޅިގެން، އިމްތިޔާޒް ފަހުމީ އަސްލަމަށް ފޮނުއްވި ސިޓީއެއްގައި ވަނީ އެ މައުލޫމާތު މަޖިލީހުން ހޯއްދަވައި، މައުލޫމާތުގެ އަލީގައި ކަމާބެހޭ ކޮމިޓީން މައްސަލަ ބައްލަވައި ދެއްވުމަށް އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
