ގެވެށި އަނިޔާގެ ޢަމަލުތައް ސޯޝަލް މީޑިއާގައި ދައުރުކުރުމުން އަނިޔާ ލިބޭ ފަރާތަށް ލިބިގެންދަނީ އިތުރު އަނިޔާއެއް ކަމަށް މޯލްޑިވްސް ޕޮލިސް ސާވިސްގެ ސީނިއާ ސާޖަންޓު މަރިޔަމް އިނާޔާ ވިދާޅުވެއްޖެއެވެ.
ޕޮލިސް ފެމިލީ އެންޑް ޖެންޑާ އެފެއާޒް ޑިޕާޓްމަންޓުގެ ތަހުގީގުކުރާ އޮފިސަރެއްގެ ގޮތުގައި މަސައްކަތް ކުރައްވަމުން ގެންދަވާ އިނާޔާ ގެވެށި އަނިޔާއާއި ބެހޭގޮތުން ޕޮލިސް މީޑިއާައަށް ދެއްވި އިންޓަވިޔުއެއްގައި ވިދާޅުވީ، ގެވެށި އަނިޔާގެ ވީޑިއޯތައް ސޯޝަލް މީޑީއާގައި ފެތުރުމުގެ ބަދަލުގައި ކަމާބެހޭ މުއައްސަސާތަކައް ފޮޓޯއާއި ވީޑިއޯ ހިއްސާކުރުމުން ގެވެށި އަނިޔާ ލިބޭފަރާތައް އެހީތެރިވުމުގެ ގޮތުން ކުރެވިދާނެ ކަމެއް ކަމަށެވެ.
މިހާރު ކޮންމެ މީހަކީވެސް ސްމާޓް ފޯނެއް ގެންގުޅޭ މީހަކަށްވާތީ، ގެވެށި އަނިޔާގެ އަމަލެއް ހިނގާވަގުތު އެބަ ވީޑިއޯކޮށް ފޮޓޯނަގާ ސޯޝަލް މީޑިއާގައި ދައުރުކުރުވާ. މިގޮތަށް ކަންތައްވުމުން އަނިޔާ ލިބޭ ފަރާތަށް އިތުރު އަނިޔާއެއްގެ ގޮތުގައި މިވަނީ.
ސީނިއާ ސާޖަންޓު މަރިޔަމް އިނާޔާ ވިދާޅުވިއެވެ
ގެވެށި އަނިޔާގެ މައްސަލައާ ގުޅޭގޮތުން އިނާޔާ އިތުރަށް ވިދާޅުވީ، އެހެން މައްސަކަތަކާއި ޚިލާފަށް ގެވެށި އަނިޔާގެ މައްސަލަތަކަކީ ގާތް ގުޅުމެއް އޮންނަ ދެމީހެއްގެ ދެމެދުގައި ހިނގާ ކަމެއްކަމަށެވެ. އެހެންވުމުގެ ސަބަބުން މައްސަލައިގެ ވަކި ހިސާބަކުން ދައުވާ އަނބުރާ ގެންދިއުމާއި މައްސަލަ އިތުރަށް ބެލުމަށް ބޭނުން ނުވާކަމަށް ބުނުމުން މައްސަލަތައް ތަހުގީގުކުރުމަށް ވަރަށް ބޮޑެތި ގޮންޖެހުންތަކަކާއި ކުރިމަތިވާކަމަށް އިނާޔާ ވަނީ ފާހަގަކުރައްވާފައެވެ.
މީގެ އިތުރުން، ގެވެށި އަނިޔާ ލިބެމުންދާ މީހަކު ލަސްނުކޮށް ކަމާބެހޭ މުއައްސަސާތަކަށް މައްސަލަ ރިޕޯޓުކޮށްދިނުމަށް އިނާޔާ ވަނީ އެދިފައެވެ. އިނާޔާ ވިދާޅުވީ، ގެވެށި އަނިޔާގެ މައްސަލަ ރިޕޯޓުކުރާނަމަ، ވީ އެންމެ ގިނަ މައުލޫމާތު ދީ ފުލުހުންނަށް އެއްބާރުލުން ދިނުމަށެވެ. އަދި އަނިޔާ ލިބިފައި ހުރި ފަރާތްތަކަށް ލިބިފައި ހުރި އަނިޔާފަދަ ކަންކަން ތަހުގީގު ކުުރުމަށްޓަކައި ފުލުހުން ފޮޓޯ ނެގުމަށް ބޭނުންވުމުން އެ ފުރުސަތުވެސް ފުލުހުންނަށް ދެއްވުމަށް ވަނީ އިލްތިމާސްކުރައްވާފައެވެ.
ގެވެށި އަނިޔާގެ މައްސަލަތައް ހުށަހެޅުމަށްޓަކައި ފުލުހުންގެ މުއައްސަސާގެ އިމަރޖެންސީ ނަންމަރު 119އަށް ގުޅުއްވައި އެ މައްސަލައެއް ރިޕޯޓުކުރެވިދާނެއެވެ. އަދި އެމަރޖެންސީ ނޫން ހާލަތްތަކުގައި ފުލުހުންގެ ހޮޓްލައިން ނަންބަރު 3322111 ނަންބަރަށް ގުޅައި އެ މައްސަލައެއް ފުލުހުންނަށް ރިޕޯޓުކުރެވިދާނެއެވެ. މީގެއިތުރުން ފެމިލީ އެންޑް ޗައިލްޑް ޕްރޮޓެކްޝަންގެ ނަންބަރުތައް ކަމަށްވާ 3000600، 9790163 އަދި މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ނަންބަރު 3328393 ، ނުވަތަ ކުޑަކުދިންގެ ހެލްޕްލައިން 1412އަށް ގުޅުއްވާ އަނިޔާގެ މައްސަލަ ރިޕޯޓުކުރެވިދާނެއެވެ.
ގެވެށި އަނިޔާގެ މައްސަލައަކީ ރާއްޖޭގައި ވަރަށް އާއްމު މައްސަލައެކެވެ. މި މައްސަލަ ހައްލުކުރެވޭނީ ގެވެށި އަނިޔާ ލިބެމުންދާ ފަރާތްތަކުގެވެސް އެއްބާރުލުމާއި އެކުގައެވެ.
Advertisement
This content is created and paid for by advertisers and does not involve Voice Journalists
