އެމްޑިޕީގެ މިސްރާބު ހުރީ ހަމަމަގަކަށް ނޫންކަމަށާއި، މިސްރާބު ހުރީ އަނދަވަޅަކަށް ކަމަށް ވިދާޅުވެ ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ މެނޭޖިންގ ޑިރެކްޓާ ހީނާ ވަލީދު، އެމްޑީޕީގެ ރައީސް ޢަބްދުﷲ ޝާހިދުއަށް ހޫނުގަދަ ރައްދެއް ދެއްވައިފިއެވެ. 

ހީނާ މިފަދައިން ރައްދުދެއްވާފައިވަނީ، ޝާހިދު މިއަދު ދ. ކުޑަހުވަދޫ ދެމަފިރިންނާއެކު އެކްސްގައި ވީޑިއޯއެއް ހިއްސާކުރައްވާ ދެއްކެވީ ވާހަކައާ ގުޅިގެންނެވެ. ޝާހިދު ވިދާޅުވެފައިވަނީ އެ ދެމަފިރިންގެ ދަރިފުޅަކީ ހިތުގެ ބަލި ތަހައްމަލު ކުރަމުންދާ ކުއްޖެއް ކަމަށެވެ.

އަދި  އާސަންދަ މެދުވެރިކޮށް އެ ދެމަފިރިންގެ ދަރިފުޅަށް ބޭނުންވާ ބޭސް ކުރީ ސަރުކާރުން ފޯރުކޮށްދީފައިވާ ކަމަށާއި ނަމަވެސް މި ސަރުކާރުން އެ ކުއްޖާއަށް ބޭނުންވާ ބޭސް ހޯދައިދިނުމުގައި ލަސްތަކެއްވާ ކަމަށް ޝާހިދު އެ ވީޑިއޯގައި ވިދާޅުވެފައިވެއެވެ.

Advertisement

މިކަމަށް ރައްދުދެއްވައި، ހީނާ މިއަދު އެކްސްގައި ކުރި ޕޯސްޓެއްގައި ވިދާޅުވީ، ބިލްތައް ރިފަންޑް ކުރަނީ އާސަންދައިން ނޫންކަމަށެވެ.

އަދި ދ. ކުޑަހުވަދޫ ޢަބްދުލްޙަކީމްގެ ހިތުގެ ބަލި ހުންނަ ދަރިފުޅަށް ބޭސް ގަތުމަށްފަހު ހުށައަޅާފައިިވާ ބިލަށް އެންމެ ފަހުން ފައިސާ ހަމަޖައްސާފައިވަނީވެސް މިދިޔަ އަހަރުގެ ޑިސެމްބަރުމަހުގައި މި ސަރުކާރުންކަމަށް އެ ޕޯސްޓުގައިވެއެވެ.

ޝާހިދުއަށް ފާޑުވިދާޅުވަމުން ހީނާ ވިދާޅުވީ، ޤައުމުގެ ބޮޑެތި މަޤާމުތައް އަދާކުރައްވާ "ދުނިޔޭގެރައީސް" ކަން ކުރައްވާފައިވާ ބޭފުޅަކު ރައްޔިތުން ގާތަށްގޮސް އެބޭފުޅުންގެ އިޙްސާސްތަކާކުޅެފައިވާ ކަމަށެވެ.

އެމްޑީޕީގެ މި އަހަރުގެ ކެމްޕެއިން ޝިޢާރުކަމަށްވާ މިސްރާބު ހަމަމަގަށް އިޝާރާތްކުރައްވާ ހީނާ ވިދާޅުވީ، ތިބޭފުޅުންގެ މިސްރާބު ހުރީ ހަމަ މަގަކަށްނޫން ކަމަށާއި މިސްރާބު ހުރީ އަނދަވަޅަކަށް ކަމަށެވެ.