ސަރުކާރެއް ބަދަލުވެދާނެ ކަމަށާއި ނަމަވެސް އެސަރުކާރަކުން ކުރަން ފަށާފައިހުރި މަޝްރޫޢުތައް ދެން އަންނަ ސަރުކާރަކުން ނުހުއްޓުވޭނެ ކަމަށް އިދިކޮޅު އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޞާލިހު މިގޮތަށް ވިދާޅުވީ، 'މިސްރާބު ހަމަމަގަށް' ޝިޢާރުގެ ދަށުން އެމްޑިޕީން ކުރިއަށްގެންދާ ކެމްޕެއިން ހަރަކާތްތަކުގެ ތެރެއިން ރޭ ބޭއްވި ގަލޮޅު ތަރާވީސް ޖަލްސާގައި ވާހަކަ ދައްކަވަމުންނެވެ. 

އެގޮތުން، ރައީސް ޞާލިހު ވިދާޅުވީ ސަރުކާރަކުން ކުރަން ފަށާފައިވާ ކަންކަމަކީ ހިތަށްއެރި ގޮތަކަށް ބަދަލުކުރެވޭނެ ކަންތައްތަކެއް ނޫންކަމަށެވެ. 

މީގެ އިތުރުން ރައީސް ޞާލިހު ވިދާޅުވީ ގދ. ފަރެސްމާތޮޑާގެ މަޝްރޫޢަކީވެސް ރައީސް ޔާމީނުގެ ވެރިކަމުގައި ފެއްޓެވި މަޝްރޫޢެއް ކަމަށެވެ.

ރައީސް ޞާލިހު ވިދާޅުވީ މިއަދުގެ މި ސަރުކާރުން ފެނިގެންދަނީ އެމަންޒަރެއް ނޫންކަމަށެވެ.

ރައީސް ޞާލިހު އިތުރަށް ވިދާޅުވީ، މަގޫދޫ އެއާޕޯޓު އެޅުމަށްޓަކައި ދައުލަތުގެ ފައިސާއިން ގާތްގަނޑަކަށް 115 މިލިއަން ރުފިޔާ ޚަރަދުކޮށް ޖުމްލަ 35 ހެކްޓަރު ހިއްކާފައިވާ ކަމަށެވެ.

އަދި ޓާމިނަލް ގެ މަސައްކަތް ފެށިފައިވާ ކަމަށާއި އެއާޕޯޓުގައި ގާއިމުކުރާ ފަޔާ ސްޓޭޝަން ވެސް ނިމުމަކާއި ހިސާބަށް ގޮސްފައިވާ ކަމަށް ރައީސް ޞާލިހު ވިދާޅުުވިއެވެ.

މިކަން މިގޮތަށް އޮތްއިރު، އަމިއްލަ ބޭނުމަށްޓަކައި ރައީސް ޑރ. މުޙައްމަދު މުޢިއްޒު މަގޫދޫ އެއާޕޯޓުގެ ޕްރޮޖެކްޓު ހުއްޓާލެއްވީކަމަށް ވިދާޅުވެ ރައީސް ޞާލިހު ވަނީ ރައީސް މުޢިއްޒުއަށް ވަރަށް ބޮޑަށް ފާޑުވިދާޅުވެފައެވެ.

ރައީސް ޞާލިހު ވިދާޅުވީ، މަޖިލީސް އިންތިހާބުން އެމްޑީޕީ މެޖޯރިޓީ ނެގުމަށްފަހު އެންމެ ފުރަތަމަވެސް ކުރައްވާނެ ކަމަކީ މި ސަރުކާރުން ހުއްޓާލާފައިވާ މަގޫދޫ އެއާޕޯޓު ގާނޫނީގޮތުން އެޅޭނެގޮތެއް މަޖުބޫރުކުރުވާނެ ކަމަށެވެ.