ކުރީގެ ރައީސް އިބްރާހިމް މުހައްމަދު ޞާލިހު ފަދަ އަނިޔާވެރިންނަށް މިގައުމުގެ ފަސްގަނޑުން ޖާގަނުދެއްވާނެ ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
މަޖިލިސް އިންތިހާބުގައި ޕީޕީއެމް/ޕީއެންސީ ޓިކެޓްގައި އައްޑޫ ހުޅުދޫއަށް ވާދަކުރައްވާ ކެންޑިޑޭޓު މުޙައްމަދު ޝާހިދުގެ ކެމްޕެއިން ޖަލްސާގައި ރޭގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، މީގެ ކުރިން ދިވެހި ތާރީހުގައި މީހުން ގައުމަށް ޣައްދާރުވީ ވެރިކަމުގެ ދަހިވެތި ކަމުގައި ކަމަށާއި، ރައީސް ޞާލިހު ގައުމަށް ޣައްދާރުވީ ވެރިކަމުގައި ހުންނަވައިގެން ކަމަށެވެ.
އަބްދުއްރަހީމް ވިދާޅުވީ، ރައްޔިތުންގެ ފުރިހަމަ ތާއީދާއެކު ވެރިކަމަށް ވަޑައިގެން ރައްޔިތުންނަށް އަނިޔާވެރިވެފައިވާ ކަމަށާއި، ދެން އިތުރަށް އެކަން ތަކުރާރު ކުރުމަށް ފުރުސަތު ނުދެއްވާނެ ކަމަށެވެ.
"ވަރަށް ކެރިގެން މި ވާހަކަ މި ދައްކަނީ. ނުދޭނަމޭ. ބޭނުންހާ ގޮތަކަށް މި ގައުމަކު ނޫޅެވޭނޭ. މިއީ ދިވެހި ރައްޔިތުންގެ ގައުމެކޭ، މިއީ އިބްރާހިމް މުހައްމަދު ސޯލިހުގެ އެކަނި ގައުމެއް ނޫނޭ. އެމްޑީޕީގެ އެކަނި ގައުމެއް ވެސް ނޫނޭ، ޕީއެންއެފްގެ އެކަނި ގައުމެއް ވެސް ނޫނޭ،"
އަބްދުއްރަހީމް ވިދާޅުވިއެވެ.
މީގެ އިތުރުންވެސް އަބްދުއްރަހީމް ވަނީ ރައީސް ޑރ.މުއިއްޒު އަކީ އިތުރުފުޅު ހައްދަވާ ބޭފުޅެއްކަމަށް ސިފަކޮށް ބައެއް ފަރާތްތަކުން ވާހަކަތައް ދެއްކި ނަމަވެސް ރައީސް މުއިއްޒުއާއި އެއްވަރަށް ތެދުވެރިކަމާއިއެކު ވެރިކަން ކުރުމުގެ ނިޔަތުގައި ރައީސްކަމަށް ވަޑައިގެންނެވި މީހަކު ރާއްޖޭގެ ތާރީހުން ފެނިފައިނުވާކަމަށާއި، އެމަނިކުފާނަކީ ރައްޔިތުންނަށް އަނިޔާވެރިވާނެ މީހެއް ނޫންކަމަށް ވެސް ވިދާޅުވެފައެވެ.
އަބްދުއްރަހީމް ވަނީ ރައީސް ޞާލިހު އެބޭފުޅާ ކައިރީގައި ޕޯޑިއަމެއް ބަހައްޓައިގެން ވާހަކަދައްކަން އަޔަސް މި ގައުމާއި ރައްޔިތުންގެ ހައްގުގައި މި ގައުމުގެ މިނިވަން ކަމަށްޓަކައި ރައީސް ޞާލިހާއި "ޖަދަލު" ކުރަން އެކަނިވެސް ނިކުންނަވަން ތައްޔާރަށް ހުރި ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
