އެމްއެމްޕީއާރުސީގެ މުއައްޒަފަކު ޖިންސީ ފުރައްސާރަކުރި ކަމަށް ބުނާ މައްސަލައެއް އެކުންފުނިން ބަލަނީ
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މުއައްޒަފަކު ޖިންސީ ފުރައްސާރަ ކުރި ކަމަށް ބުނާ މައްސަލައެއް ސޯޝަލް މީޑިއާ ތެރޭ ދައުރުވަމުންދާތީ، އެކުންފުނިން އެމައްސަލަ ބަލަން ފަށައިފިއެވެ.
މި މައްސަލައާއި ގުޅިގެން އެމްއެމްޕީއާރުސީން ނެރުނު ނޫސް ބަޔާނެއްގައި ބުނީ، މުވައްޒަފަކާ ގުޅޭ ގޮތުން ސޯޝަލް މީޑިއާގައި ދައުރުވަމުންދާ ފަދަ އެއްވެސް މައްސަލައެއް ކުންފުނީގެ އެއްވެސް މުއައްޒަފަކު ރަސްމީ މައްސަލައެއްގެ ގޮތުގައި ހުށައަޅާފައިނުވާ ކަމަށެވެ.
އެހެންނަމަވެސް، މެނޭޖްމަންޓަށް ލިބިފައިވާ މައުލޫމާތަކާ ގުޅިގެން އެކަމުގެ ސައްހަކަން ކަށަވަރު ކުރަމުން އަންނަ ކަމަށާއި މެނޭޖްމަންޓުން އަޅަން ޖެހޭ ފިޔަވަޅު އެޅުމަށްޓަކައި ޑިސިޕްލިނަރީ ކޮމިޓީއަށް މި މައްސަލައިގެ މައުލޫމާތު ހިއްސާކޮށްފައިވާއިރު، އެކޮމިޓީގެ ތަހުގީގަށްފަހު ފިޔަވަޅުތައް އަޅާނެ ކަމުގެ ޔަގީންކަން އެ ކުންފުނިން ވަނީ ދީފައެވެ.
އެމްއެމްޕީއާރުސީން ބުނީ، ޖިންސީ ފުރައްސާރައިގެ އަމަލުތަކަކީ އެމްއެމްޕީއާރްސީގެ މެނޭޖްމަންޓުން އެއްވެސް ހާލެއްގައި ބަލައިގަންނާނެ އަމަލުތަކެއް ނޫންކަމަށާއި، އެފަދަ އަމަލެއް ކޮށްފި ކޮންމެ މުވައްޒަފަކާމެދު ކުންފުނިން އެޅެންހުރި އެންމެ ހަރުކަށި ފިޔަވަޅު އަޅާނެ ކަމަށެވެ.
Advertisement
This content is created and paid for by advertisers and does not involve Voice Journalists