ކުރިއަށް އޮތް ފިތުރުއީދަށް އިސްލާމީވަންތަ ލައިޓްތަކާއި އެކު ރާއްޖޭގެ ރަށްތައް ޒީނަތްތެރި ކުރެވޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ވަޒީރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވީ، މިއަހަރުގެ ފިތުރު އީދުގައި ރާއްޖޭގެ ހުރިހާ ސިޓީތަކަކާއި އަތޮޅު ކައުންސިލް އިދާރާ ގާއިމުވެފައިވާ ރަށްތައް ޒީނަތްތެރި ކުރެވިގެންދާނެ ކަމަށެވެ. ޒީނަތްތެރިކުރުމަށް ބޭނުންކުރާ އިސްލާމީ ވަންތަކަން ދައްކުވައިދޭ ލައިޓްތަކުގެ އިތުރުން، ތަކުބީރުތަކުގެ އަޑު އެ ރަށްތަކަށް ދިރުން ލިބިގެންދާނެ ކަމަށް ވެސް ވަޒީރު ވިދާޅުވިއެވެ.

ޒީނަތްތެރި ކުރުމުގެ މަސައްކަތްކުރިއަށްދާ ކަމަށް ބުނެ ވަޒީރު ވަނީ އެ މަސައްކަތްތަކުގެ ފޮޓޯތަކެއް ވެސް ހިއްސާކުރައްވާފައެވެ.

މިދިޔަ އަހަރު ބޮޑު އީދު ކުލަގަދަކޮށް ފާހަގަކުރުމަށްޓަކައި މާލެ ސިޓީ ކައުންސިލުން އިސްގަނައިގެން ކުލަ ބޮކިތަކުން މާލެތެރެ ޒީނަތްތެރިކޮށް، ތަކުބީރުގެ އަޑުއިވޭގޮތަށް ސްޕީކަރުތައް ހަރުކޮށް ހިންގި ހަރަކާތަށް ގިނަ ބައެއް ތައުރީފު ވަނީ ލިބިފައެވެ.

ރައީސް ޑރ.މުއިއްޒުގެ ވެރިކަމުގައި ކުލަގަދަކޮށް އީދު ފާހަގަކުރައްވާނެ ކަމަށް އެމަނިކުފާނު ވައުދުފުޅު ވެފައިވާއިރު، މި ވައުދުފުޅު ފުއްދެވުމުގެ ގޮތުން އީދު ފާހަގަކުރުމަށް 50،100،000 ރުފިޔާ ބަޖެޓްގައި ހިމަނުއްވާފައިވާކަން ފާހަގަކޮށްލެވެއެވެ.