2024 ވަނަ އަހަރުގެ މަޖިލިސް އިންތިޚާބުގައި އެކިއެކި ދާއިރާތަކަށް ވާދަކުރައްވާ ސަރުކާރު ކެންޑީޑޭޓުންގެ ކެމްޕެއިން ޖަލްސާތައް ކޮންމެ ރެއަކި މާލޭގައި ބާއްވަމުންދާގޮތަށް، މިރޭވެސް 02 ދާއިރާއެއްގެ ޖަލްސާ މާލޭގައި ބޭއްވުމަށް ވަނީ ހަމަޖެހިފައި ކަމަށް އެ ޕާޓީން ބުނެފިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއާއި އެމަނިކުފާނުގެ އަރިހުން ދަޢުލަތުގެ އެކި ވަޒީރުން ބައިވެރިވާ މި ކެމްޕެއިންޖަލްސާ ތަކުގެ ތެރެއިން މިރޭ 22:00 ގައި ބޭއްވުމަށް ހަމަޖެހިފައިވަނީ މައްޗަންގޯޅި އުތުރު ޖަގަހައިގައެވެ.

މި ޖަލްސާ އޮންނާނީ މއ.މާރާދަގެ، ދަނބުރުއް މަގުގައެވެ. 

އަދި އެއަށްފަހުމިރޭ 23:00 ގައި ގަމު ދާއިރާއަށް ވާދަކުރައްވާ ސަރުކާރުގެ ކެންޑިޑޭޓްގެ ޖަލްސާ ބޭއްވުމަށްވެސް ވަނީ ހަމަޖެހިފައެވެ.

މި ޖަލްސާ އޮންނާނީ ބިސްބުރު ކައިރީ ކުޑަ ޕާކުގައެވެ.

ކުރިއަށް އޮތް މަޖިލީސް އިންތިހާބަށް ޕީއެންސީގެ ޓިކެޓް ގައި 89 ކެންޑިޑޭޓަކު ވާދަކުރާއިރު، ތިން ދާއިރާއަކަށް ވާދަ ކުރާ ތިން ޕާޓީގެ ލީޑަރުންނަށް އެ ކޯލިޝަންގެ ތާއީދު ވަނީ ދީފައެވެ. އެ ތިން ލީޑަރުންނަކީ، އެމްޑީއޭގެ ރައީސް އަހުމަދު ސިޔާމް، އެމްއެންޕީގެ ރައީސް މުހައްމަދު ނާޒިމްގެ އިތުރުން މާމިގިލީ ދާއިރާގެ މެންބަރު ގާސިމް އިބްރާހީމެވެ.

މި އަންނަ މަހުގެ 21 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި 42 އަންހެނުންނާއި އަދި 326 ފިރިހެނުން ހިމެނޭހެން ޖުމްލަ 368 ކެންޑިޑޭޓަކު ވާދަކުރާއިރު، މި އިންތިހާބުގައި ވޯޓު ލެވޭ މީހުންގެ އަދަދު 284،887 އަށް އަރައެވެ.