ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އާއި އަނބިކަބަލުން ބުޝްރާ ބިބީގެ މައްޗަށް ކޮރަޕްޝަންގެ ކުށް ސާބިތުވެ، އިއްވާފައިވާ 14 އަަހަރުގެ ޖަލު ހުކުމް ފަސްކުރުމަށް ޕާކިސްތާނުގެ ކޯޓަކުން ހުކުމް ކޮށްފިއެވެ.

އިއްވާފައިވާ 14 އަހަރުގެ ޖަލު ހުކުމް ފަސްކުރިޔަސް، އެދެކަނބަލުންގެ މައްޗަށް ސާބިތުވެފައިވާ އެހެން ކުށްތަކުގެ ސަބަބުން ޖަލުން ނުކުމެވަޑައިނުގަނެވޭނެއެވެ. 

އުމުރުފުޅުން 71 އަހަރުގެ އިމްރާން ޚާން ގެ މައްޗަށް ޚިޔާނާތާއި ގަވާއިދާއި ޚިލާފަށް ކައިވެނިކުރުން ހިމެނޭހެން 170 ކުށެއްގެ ދައުވާ ވަނީ އުފުލާފައެވެ.އަދި އިމްރާން ޚާން ބޮޑު ވަޒީރު މަގާމުގައި ހުންނަވަނިކޮށް އަނބިކަބަލުން ބުޝްރާ އާއި އެމަނިކުފާނަށް ލިބުނު ދައުލަތުގެ ހަދިޔާތަކާއި ގުޅޭ ޚިޔާނާތުގެ ކުށް ސާބިތުވެ 14 އަހަރަށް ޖަލަށް ލުމަށް ހުކުމް ކުރީ މިއަހަރުގެ ޖެނުއަރީ މަހުގެ ތެރޭގައިއެވެ.

Advertisement

މި ދެމަފިރިންގެ މައްޗަށް ކޮށްފައި ވަނީ ވެރިކަމުގައި ހުންނަވައިގެން ދައުލަތުގެ ހަދިޔާތައް ހިފެހެއްޓުމާއި ވިއްކުމުގެ ކުށުގެ ދައުވާ އެވެ. މި ހަދިޔާ ތަކުގެ ތެރޭގައި ސައުދީ އަރަބިއާ ގެ ވަލީއުލްއަމްރު ހަދިޔާ ކުރެއްވި ރަން ގަހަނާ ސެޓެއްވެސް ހިމެނޭ ކަމަށް ބޭރުގެ ނޫސްތަކުން ރިޕޯޓް ކުރެއެވެ. ޕާކިސްތާނުގައި ސަރުކާރުގެ ވެރިންނަށް މިފަދަ ހަދިޔާތައް ގަތުމުގެ ހުއްދަ އޮތް ނަމަވެސް ވިއްކުމުގެ ހުއްދަ އެއް ނޯވެއެވެ.

މި ހުކުމާއި ގުޅިގެން އިމްރާން ޚާން ނިސްބަތްވެވަޑައިގަންނަވާ ޕާޓީ، ތަހްރީކީ އިންސާފް (ޕީޓީއައި) ގެ އިސްބޭފުޅަކު ވިދާޅުވީ،ދައުލަތުގެ ހަދިޔާތަކެއް ވިއްކި ކަމަށް ބުނާ މައްސަލައިގައި އެންޓި ކޮރަޕްޝަން ކޯޓަކުން އިއްވާފައިވާ ހުކުމްތައް ފަސްކުރުމަށް އިސްލާމް އާބާދު ހައި ކޯޓުން އަމުރުކުރީ ހުކުމްތަކުގެ އިސްތިއުނާފް ކުރިއަށްދާތީ ކަމަށެވެ.

މިދިޔަ ފެބްރުއަރީ މަހުގެ 8 ވަނަ ދުވަހު ބޭއްވި އެގައުމުގެ އިންތިހާބުގެ ކުރިން އިމްރާން ޚާނާއި އަނބިކަބަލުން ބުޝްރާގެ މައްޗަށް ވަނީ ހުކުމްތައް ކޮށް ނިންމާފައެވެ. އެއާއިއެކު އިމްރާން ޚާނަށް އިންތިހާބުގައި ބައިވެރިވުމުގެ ފުރުސަތު ގެއްލުނު ނަމަވެސް، ޕާކިސްތާނުގެ އިންތިހާބުގައި އެ ގައުމުގެ މަޖިލީހުގެ އެންމެ ގިނަ ގޮނޑި ކާމިޔާބު ކުރީ އިމްރާން ޚާން އަށް ތާއީދުކުރާ ފަރާތްތައްކަން ފާހަގަކޮށްލެވެއެވެ.