ޓައިވާނަށް 7.4 މެގްނިޓިއުޑްގެ ބާރުގަދަ ބިން ހެލުމެއް އަތުވެއްޖެއެވެ.

ކަމާބެހޭ ފަރާތްތަކުން ބުނީ މިއީ 25 އަހަރުގެ ތެރޭގައު ޓައިވާނަށް އައި އެންމެ ބާރުގަދަ ބިން ހެލުން ކަމަށާއި، ކުރިއަށް އޮތް ތަނުގައި ވެސް މިފަދަ އިތުރު ބިންހެލުންތައް އައުމުގެ ފުރުސަތު ބޮޑު ކަމަށެވެ. އަދި ބިން ހެލުމަށްފަހު އައި ގުޑުން ތަކުގައި ވެސް 6.5 މެގްނިޓިއުޑް ހުރިކަން އެ ފަރާތްތަކުން ވަނީ ހާމަކޮށްފައެވެ.

ޓައިޕޭގެ ސެންޓްރަލް ވެދަރ އެޑްމިނިސްޓްރޭޝަންގެ ސެއިސްމޮލޮޖީ ސެންޓަރުގެ ޑިރެކްޓަރ ވިދާޅުވީ މި ބިން ހެލުން އައި ވަގުތު މުޅި ޓައިވާން ވެސް ގުޑައިގެން ދިޔަ ކަމަށާއި، މި ބިން ހެލުން އައިސްފައިވަނީ އައްސޭރިފަށަށްވުރެ، ބިމާއި ކައިރިން ކަމަށެވެ.

ޓައިވާނަށް އައި މި ބާރުގަދަ ބިން ހެލުމުގެ ސަބަބުން އެގައުމުގެ 26 އިމާރާތެއް ވެއްޓި އިމާރާތްތަކުގެ ދަށުގައި މީހުން ވަނީ ތާށިވެފައެވެ. މިހާތަނަށް މި ހާދިސާގެ ސަބަބުން 4 މީހަކު މަރުވެފައިވާއިރު، 50 މީހުންނަށް ވަނީ އެކިވަރުގެ އަނިޔާތައް ލިބިފައެވެ.

މި ބިންހެލުމާއި ގުޅިގެން ޓައިވާނާއި ފިލިޕީންސް ގެ އިތުރުން ޖަޕާނަށް ވެސް ވަނީ ސުނާމީގެ އިންޒާރު ދީފައެވެ.

ޖަޕާނުގެ މޫސުމާ ބެހޭ އިދާރާއިން ބުނީ ބިން ހެލުން ޓައިވާނަށް އެރިތާ 15 މިނިޓް ފަހުން ޖަޕާނުގެ ޔޮނަގުނީ ގެ އައްސޭރި ފަށަށް 1 ފޫޓު ބޮޑު ރާޅެއް އަރާފައިވާ ކަމަށެވެ. ޔޮނަގުނީ ގެ އިތުރުން އެގައުމުގެ އިޝިގާކީ އާއި މިޔާކޯ އަށް ވެސް އެކި ވަރުގެ ރާޅުތައް އަރާފައިވާކަމަށް އެއިދާރާއިން ރިޕޯޓް ކުރެއެވެ.

މި ބިންހެލުމުގެ އަސަރު ޗައިނާގެ ޝަންހާއީ އަށް ވެސް ކޮށްފައިވާއިރު، ޗައިނާގެ އިރުދެކުނު އައްސޭރީގައި އޮންނަ ބައެއް ޕްރޮވިންސްތަކަށް ވެސް ވަނީ ކޮށްފައެވެ. އެހެންނަމަވެސް ޗައިނާ އިން ސުނާމީގެ އިންޒާރުދީފައެއް ނުވެއެވެ.