މިހިނގާ 2024 ވަނަ އަހަރުގެ ފުރަތަމަ ތިން މަސް ނިމުނު އިރު ރާއްޖެ އައި ފަތުރުވެރިންގެ އަދަދު 6 ލައްކައަށް ވުރެ މަތިވެއްޖެއެވެ.

މިގޮތުން މިއަހަރުގެ ފުރަތަމަ ތިން މަސްދުވަސް ތެރޭ ރާއްޖެ އަށް  604,004 ފަތުރުވެރިން ޒިޔާރަތްކޮށްފައިވާއިރު، މިއީ ފާއިތުވެ ދިޔަ ދެ އަހަރުގެ މި މުއްދަތާއި އަޅާ ބަލާއިރު 15.3 އިންސައްތައިގެ ކުރިއެރުމެކެވެ. އެގޮތުން ނިމިދިޔަ 2023 ވަނަ އަހަރުގެ މި މުއްދަތުގައި 523,928 ފަތުރުވެރިން ރާއްޖެ އަށް ޒިޔާރަތްކޮށްފައިވާއިރު، 2022 ވަނަ އަހަރުގެ ފުރަތަމަ ތިން މަސްދުވަހު ރާއްޖެ އަށް ޒިޔާރަތްކޮށްފައިވަނީ 431,524 ފަތުރުވެރިންނެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ފާއިތުވި ދެ އަހަރާއި އަޅާ ބަލާއިރު، މި އަހަރުގެ ފުރަތަމަ ތިންމަހު ވެސް ރާއްޖެ އައި ފަތުރުވެރިންގެ އަދަދު ވަނީ މަތިވެފައެވެ.

Advertisement

އެ މިނިސްޓްރީން ހާމަ ކުރާ ފަތުރުވެރިކަމުގެ ޑެއިލީ ރިޕޯޓް އަށް ބަލާއިރު، ރާއްޖެ އަށް އެންމެ ގިނަ ފަތުރުވެރިން މިހާތަނަށް މި އަހަރު ޒިޔާރަތްކޮށްފައިވަނީ މިދިޔަ އަހަރު މާކެޓުގެ ތިން ވަނައިގައި އޮތް ޗައިނާ އިން ނެވެ. މިގޮތުން ޗައިނާ އިން 67,399 ފަތުރުވެރިން ރާއްޖެ އަށް ޒިޔާރަތްކޮށްފައިވާއިރު، މާކެޓުގެ ދެވަނައިގައި އޮތް ރަޝިއާއިން ރާއްޖެ އަށް 61,752 ފަތުރުވެރިން ވަނީ ޒިޔާރަތްކޮށްފައެވެ. 58,382 ފަތުރުވެރިންނާއި އެކު އިނގިރޭސިވިލާތް ތިންވަނައިގައި އޮތް އިރު، މިދިޔަ އަހަރުގެ މި މުއްދަތުގައި އެއްވަނައިގައި އޮތް އިންޑިއާ ވަނީ 34,855 ފަތުރުވެރިންނާއި އެކު މާކެޓުގެ ފަސް ވަނައަށް ވެއްޓިފައެވެ.

ނިމިދިޔަ މާޗު މަހު އެންމެ ގިނަ ފަތުރުވެރިން ރާއްޖެ އަށް ޒިޔާރަތްކޮށްފައިވަނީ 23 ވީ ހޮނިހިރު ދުވަހުއެވެ. މިދުވަހު ރާއްޖެ އަށް 8,464 ފަތުރުވެރިން ޒިޔާރަތްކޮށްފައިވާއިރު، ފަތުރުވެރިން ރާއްޖޭގައި އެވަރެޖް ކޮށް 7.9 ދުވަސް ހޭދަ ކުރެއެވެ.