ސަރުކާރުގެ ކުންފުނިތަކުގެ ހިންގުން ހަރުދަނާކުރުމަށްޓަކައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު(ޕީސީބީ)ން ޚާއްޞަ އެވޯޑެއް ދޭން ނިންމައިފިއެވެ.

ޕީސީބީން ބުނީ، މިއީ މި އެވޯޑު ދިނުމުގެ މައިގަނޑު މަގްސަދަކީ، ދައުލަތުގެ ކުންފުނިތަކުގެ ހިންގުން ހަރުދަނާކުރުމުގެ އިތުރުން ވިޔަފާރީގެ މައިދާނުގައި މަސައްކަތަށް އިތުރު ހިތްވަރުދިނުން ކަމަށެވެ. އަދި "ގަވަނަންސް އެވޯޑް"ގެ ނަމުގައި ދެވޭ މި އެވޯޑު ހަވާލުކުރެވޭނީ ހަމައެކަނި ސަރުކާރުގެ ކުންފުނިތަކަށްކަމަށް ވެސް އެ އިދާރާއިން ހާމަކުރެއެވެ.

މިކަމާއި ގުޅިގެން ޕީސީބީގެ ސެކްރެޓަރީ ޖެނެރަލް އަޙްމަދު ޔާމީން ވިދާޅުވީ ގަވަނަންސް އެވޯޑު ދިނުމުގެ އުޞޫލު އެކުލަވާލާ ނިމިފައިވާ ކަމަށާއި އެވޯޑުގެ މަޢުލޫމާތު މިދިޔަ އަހަރު ކުންފުނިތަކާއި ޙިއްސާކޮށްފައިވާކަމަށެވެ. އަދި މިއީ ޕީސީބީން އެކުލަވާލާ މިނިވަން ކޮމިޓީއަކުން ދިނުމަށް ހަމަޖެހިފައިވާ އެވޯޑެއްކަން ފާހަގަކުރައްވާ ޔާމީން ވިދާޅުވީ، އެވޯޑު ދެވޭނީ ޕީސީބީން ކަނޑައަޅާ މިންގަނޑުން ކަމަށެވެ.

Advertisement

ސަރުކާރު ކުންފުނިތަކުގެ ހާލަތު ރަނގަޅުކުރެއްވުމަކީ ރައީސް ޑރ.މުޢިއްޒުގެ ރިޔާސީ ވައުދުފުޅަކަށްވާއިރު، ކުންފުނިތަކުގެ މާލީ ހާލަތު ރަނގަޅުކުރުމަށް ސަރުކާރުން ހަރުދަނާ އުސޫލުތަކެއް ތައާރަފުކޮށް ކުންފުނިތަކުގެ ހިންގުމުގެ ނިޒާމު ރަނގަޅުކުރުމުގެ މަސައްކަތް ކުރަމުންއަންނަ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.