ސްޕޯޓްސް އެރީނާ އާއި އެކި ކަހަލަ ކޯޓުތައް އެޅުމުގެ ގިނަ މަސައްކަތްތަކެއް މި އަހަރު ހިނގަމުންދާނެ ކަމަށް ރައީސުލްޖުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވީ ރައީސް އޮފީހުން ސިލްސިލާކޮށް ގެނެސްދޭ ރައީސްގެ ޖަވާބު ޕްރޮގްރާމްގައި ނ.މާޅެންދޫ، ލައިފްހާޓް، މުޙައްމަދު ނިޝާމް، ރާއްޖޭގެ އެކި ސަރަޙައްދުތަކުގައި ސްޕޯޓްސް އެރީނާތައް ޤާއިމުކުރެއްވުމުގެ ވަޢުދާ ގުޅޭގޮތުން ދެންނެވި ސުވާލަށް ޖަވާބު ދެއްވަމުންނެވެ.
މިގޮތުންް މުހައްމަދު ނިޝާމް ވަނީ ސްޕޯޓްސް އެރީނާ ތަކެއް ގާއިމުކޮށްދެއްވާނެ ކަމަށް ރައީސް މުއިއްޒު ކެމްޕޭން ތެރޭގައި ވައުދުވެވަޑައިގެންނެވި ކަން ފާހަގަކޮށް، އެރީނާތައް ގާއިމު ވެގެންދާނީ ކޮން އިރަކުންތޯ އެމަނިކުފާނާއި ސުވާލު ކޮށްފައެވެ.
މި ސުވާލަށް ޖަވާބު ދެއްވަމުން ރައީސް މުއިއްޒު ވިދާޅުވީ، ކުޅިވަރުގެ ދާއިރާ އަކީ މި ސަރުކާރުން ވަރަށް ބޮޑު އިސްކަމެއް ދޭ ދާއިރާއެއް ކަމަށާއި ކުޅިވަރަށް ހާއްސަ ވުޒާރާއެއްވެސް އުފެއްދީ އެބޭނުމަށް ކަމަށެވެ.
ކުޅިވަރު ކުޅޭ އެކިއެކި ވަސީލަތްތައް ގާއިމްކޮށްދިނުމާއި، ކުޅިވަރު ކުޅޭ އެކި ކަހަލަ ފަރާތްތަކަށް އެކި ކަހަލަ ކަންތައްތައް ފަހިކޮށްދިނުމަކީވެސް މި ސަރުކާރުގެ ވަރަށް ބޮޑު ސިޔާސަތެއް ކަަން ރައީސް މުއިއްޒު ފާހަގަކުރެއްވިއެވެ.
"ސްޕޯޓްސް އެރީނާ އަދި ވަކިވަކި ކޯޓުތައް އެޅުމާއި، އިންޑޯ ކޯޓުތަކާއި އަންހެން ބޭފުޅުންނަށް ހާއްސަކޮށް ބޭނުންވޭ ހޭންޑްބޯލް ކޯޓު، މިހެންގޮސް އެކި ކަހަލަ ކޯޓުތައް އެޅުމަށް މި އަހަރު ތެރޭ ގިނަ މަސައްކަތްތަކެއް ހިނގާނެ،".
ރައީސް މުއިއްޒު ވިދާޅުވިއެެވެ.
ރައީސް މުއިއްޒު ވިދާޅުވީ، ސްޕޯޓްސް ކޮމްޕްލެކްސްތައް ގާއިމްކޮށްދިނުމާއި، ކޯޓުތައް އަޅާ ދިނުމަކީ އެމަނިކުފާނު ވެވަޑައިގެންނެވި ވައުދުތައް ކަމަށެވެ. މި ވައުދުތައް ފުއްދުމުގެ ތެރެއިން މިހާރުވެސް އެކި ރަށްރަށުގައި މި މަސައްކަތްތައް ފެށުމުގެ މަރުހަލާގައި ހުރި އިރު ، ބައެއް ރަށްރަށުގައި އަމަލީގޮތުން އެ މަސައްކަތް ފެށިފައިވާ ކަމަށް ރައީސް މުއިއްޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
