އިއްޔެގެ ވަގުތެއްގައި ޓައިވާނަށް އައި ބިންހެލުމުގައި މިހާތަނަށް 9 މީހަކު މަރުވެ، ހާހަކަށްވުރެ ގިނަ މީހުން ޒަހަމްވެއްޖެއެވެ.

ޓައިވާންގެ ނޭޝަނަލް ފަޔަރ އެޖެންސީން ބުނީ އިއްޔެ އައި 7.4 މެގްނިޓިއުޑްގެ ބާރުގަދަ ބިން ހެލުމުގައި 9 މީހަކު މަރުވެ ޖުމްލަ  1,038 މީހަކު ޒަހަމްވެފައިވާއިރު، 52 މީހަކު ގެއްލިފައިވާ ކަމަށެވެ. ގެއްލިފައިވާ މީހުންގެ ތެރޭގައި އެގައުމުގެ ހޮޓެލެއްގައި މަސައްކަތް ކުރާ 38 މީހަކު ވެސް ހިމެނެއެވެ.

މި ހާދިސާގައި އެ ގައުމުގެ 26 އިމާރާތެއް ވެއްޓިފައިވާއިރު، އަނިޔާވި މީހުން ހޯދުމަށް އެގައުމުގެ ކަމާ ބެހޭ ފަރާތްތަކުން އަންނަނީ ހެލިކޮޕްޓަރާއި ޑްރޯން ބޭނުންކުރަމުންނެވެ. 

Advertisement

އިއްޔެ ޓައިވާނަށް އައި މި ބިންހެލުމަކީ 25 އަހަރު ފަހުން އެގައުމަށް އައި އެންމެ ބާރުގަދަ ބިން ހެލުމެވެ. މީގެ ކުރިން އެގައުމަށް އެންމެ ބާރު ގަދަ ބިން ހެލުމެއް އައިސްފައިވަނީ 1999 ވަނަ އަހަރުއެވެ.

ޓައިޕޭގެ ސެންޓްރަލް ވެދަރ އެޑްމިނިސްޓްރޭޝަންގެ ސެއިސްމޮލޮޖީ ސެންޓަރުގެ ޑިރެކްޓަރ ވިދާޅުވީ މި ބިން ހެލުން އައި ވަގުތު މުޅި ޓައިވާން ވެސް ގުޑައިގެން ދިޔަ ކަމަށާއި، މި ބިން ހެލުން އައިސްފައިވަނީ އައްސޭރިފަށަށްވުރެ، ބިމާއި ކައިރިން ކަމަށެވެ.

ޖަޕާނުގެ މޫސުމާ ބެހޭ އިދާރާއިން ބުނީ ބިން ހެލުން ޓައިވާނަށް އެރިތާ 15 މިނިޓް ފަހުން ޖަޕާނުގެ ޔޮނަގުނީ ގެ އައްސޭރި ފަށަށް 1 ފޫޓު ބޮޑު ރާޅެއް އަރާފައިވާ ކަމަށެވެ. ޔޮނަގުނީ ގެ އިތުރުން އެގައުމުގެ އިޝިގާކީ އާއި މިޔާކޯ އަށް ވެސް އެކި ވަރުގެ ރާޅުތައް އަރާފައިވާކަމަށް އެއިދާރާއިން ރިޕޯޓް ކުރެއެވެ.

މި ބިންހެލުމުގެ އަސަރު ޗައިނާގެ ޝަންހާއީ އަށް ވެސް ކޮށްފައިވާއިރު، ޗައިނާގެ އިރުދެކުނު އައްސޭރީގައި އޮންނަ ބައެއް ޕްރޮވިންސްތަކަށް ވެސް ވަނީ ކޮށްފައެވެ. އެހެންނަމަވެސް ޗައިނާ އިން ސުނާމީގެ އިންޒާރުދީފައެއް ނުވެއެވެ.