މަޝްރޫއުތައް ހުއްޓާލީ މި ސަރުކާރުން ކަމަށް އިދިކޮޅުން ބުނާ ބުނުމަކީ ސަރުކާރުގެ ސިޔާސަތާއި އިދިކޮޅަށް ދައްކާ ވާހަކަކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ، ރައީސް އޮފީހުން ސިލްސިލާކޮށް ގެނެސްދޭ ރައީސް ގެ ޖަވާބު ޕްރޮގްރާމްގައި، މާލެ ސިޓީ، މމޚ ދަފްތަރު 12151، އާމިނަތު ނަޒީރާ، ކުރިން ސަރުކާރުން ހިންގަމުން އައި މަޝްރޫއުތައް މި ސަރުކާރުން ހުއްޓާލިކަމަށް ވާދަވެރި ފަރާތްތަކުން ދައްކާ ވާހަކަތަކާއި މެދު ކުރި ސުވާލަށް ޖަވާބުދެއްވަމުންނެވެ.
މިސުވާލަށް ޖަވާބު ދެއްވަމުން ރައީސް ޑރ.މުއިއްޒު ވިދާޅުވީ، އިދިކޮޅު ފަރާތްތަކުން އެމަނިކުފާނާއި ދެކޮޅަށް އެންމެ ބޮޑަށް ދޮގު ހަދަމުން ދަނީ މި ސަރުކާރުން މަޝްރޫއުތައް ހުއްޓާލާފައިވާ ކަމަށް ބުނެ ކަމަށާއި، ރިޔާސީ ކެމްޕޭނު ތެރޭގައި ވަޑައިގެންނެވި ހުރިހާ ރަށަކުން ކަހަލަ ގޮތަކަށް ފެނުނީ މަޝްރޫއުތައް ހުއްޓިފައި އޮތް ތަން ކަމަށެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން މަޝްރޫއުތައް ހަވާލުކޮށްފައިވަނީ ޕާޓީގެ ފަަރާތްތަކަށް ފައިސާ ދިނުމުގެ ނިޔަތުގައި ކަމަށް ތުހުމަތުތަކެއް ކޮށްފައިވާ ކަމަށް ވިދާޅުވެ ރައީސް ޑރ.މުއިއްޒު ވަނީ އެޑްވާންސް ޕޭމަންޓު ނަގާފައި ކުރިއަށް ނުގޮސް ހުރި ވަރަށް ގިނަ މަޝްރޫއުތައް ހުރި ކަން ފާހަގަކުރައްވާފައެވެ.
''އަޅުގަނޑުމެން އައިސްފައި މަސައްކަތް ފެއްޓެވީ، އެކަމަކު ވާހަކަ ދައްކަނީ ތިމަންނަމެންގެ ސަރުކާރުގައި ފަށާފައި ހުރި މަޝްރޫއުތައް އަޅުގަނޑުމެން ހުއްޓާލީއޭ، މިއީ ރައްޔިތުން ސަމާލުވާން ޖެހޭ ކަމެއް، މިއީ ދޮގު ހަދާ ގޮތަކީ އެ ބޭފުޅުން، މިގޮތަށް ކަންކަމުގެ ހަގީގަތް އޮޅުވާލަމުން ދަނީ''
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު މީގެ އިތުރުންވެސް ވިދާޅުވީ، މި ސަރުކާރުން ވެރިކަމާއި ހަވާލުވީ ތަރައްގީ ގެނެސްދިނުމަށް ކަމަށާއި ވައުދުވީ ހުރިހާ ރަށެއްގައި ހުރިހާ މަޝްރޫއުއެއް ހިންގުމަށް ކަމަށްވާއިރު، މަޝްރޫއުތައް ހުއްޓާލިކަމަށް ބުނެ ދައްކާ ވާހަކަ އަކީ ސަރުކާރުގެ ސިޔާސަތާ ދެކޮޅަށް ދައްކާ ވާހަކަތަކެއް ކަމަށެވެ.
Advertisement
This content is created and paid for by advertisers and does not involve Voice Journalists
