އެމްޑީޕީއަށް މަޖިލީހުގެ މެޖޯރިޓީ ލިބިއްޖެނަމަ މި ސަރުކާރަށް ޖެއްސުންކުރުން ފިޔަވާ އިތުރު ކަމެއް ނުކުރާނެ ކަމަށް ފަތުރުވެރިކަމާބެހޭ ވަޒީރު، އިބްރާހީމް ފައިސަލް ވިދާޅުވެއްޖެއެވެ.

ފައިސަލް މިހެން ވިދާޅުވީ، ރައްޔިތުންގެ މަޖިލީހުގެ ފޮނަދޫ ދާއިރާއަށް ވާދަކުރައްވާ ސަރުކާރު ކެންޑިޑޭޓް، އަބްދުއްރަހީމުގެ ކެމްޕެއިން ހަރަކާތުގައި ރޭ ބައިވެރިވެވަޑައިގެން ވާހަކަފުޅު ދައްކަވަމުންނެވެ.

ފައިސަލް ވިދާޅުވީ، ރައީސް ޑރ. މުޙައްމަދު މުޢިއްޒު ނިމިދިޔަ ރިޔާސީ އިންތިހާބު ކާމިޔާބުކުރެއްވީ 129،000 ވޯޓުގެ ފުރިހަމަ ތާއީދާ އެކީގައި ކަމަށެވެ.

Advertisement

މިކަމުންވެސް އެނގިގެންދިޔައީ ދިވެހިން ބޭނުންވީ ނިމިދިޔަ އަނިޔާވެރި ސަރުކާެރު ބަދަލުކޮށް އޯގާތެރި، ރައްޔިތުންނަށް ޚިދުމަތްކޮށްދޭނެ ވެރިއަކު އިންތިޚާބުކުރުން ކަމުގައި ފައިސަލް ވިދާޅުވިއެވެ.

ފައިސަލް އިތުރަށް ވިދާޅުވީ، އެމްޑީޕީއަށް މަޖިލީހުގެ މެޖޯރިޓީ ލިބިއްޖެނަމަ މި ސަރުކާރަށް ޖެއްސުންކުރުން ފިޔަވާ އިތުރު ކަމެއް ނުކުރާނެ ކަމަށެވެ.

ރައީސް ޑރ. މުޙައްމަދު މުޢިއްޒު މިއަދު ވަޑައިގަނެފައި އެހުންނެވީ ތަރައްޤީގެ ވަރަށް ބޮޑެތި މަޝްރޫޢުތަކާއެކު ދިވެހީންގެ ހާލަތު ބަދަލުކޮށްލެއްވުމަށް ކަމަށްވެސް ފައިސަލް ވިދާޅުވިއެވެ.

އަދި ކުރީގެ އެއްވެސް ރައީސަކު މި ވެރިކަމުގައި ޖަލުގޮޅީގައި ބަންދުކޮށްފައި ނުވާކަން ފާހަގަކުރައްވައި ފައިސަލް ވިދާޅުވީ، ރައީސް ޑރ. މުޙައްމަދު މުޢިއްޒުއަކީ އެފަދަ ގޮތަކަށް ބަދަލުހިފުމުގެ ރޫހު ގެންގުޅުއްވާނެ ބޭފުޅެއް ނޫން ކަމަށެވެ.

ކުރީގެ ރައީސް އިބްރާހީމް މުޙައްމަދު ޞާލިހު މިއަދު މަޖިލީސް އިންތިހާބަށް މަގުތަކަށް ނިކުމެ އެކުރައްވަމުން ގެންދަވާ ކެމްޕެއިންތަކުންވެސް މިކަން ވަރަށް ސާފުކޮށް އެނގިގެންދާކަމަށް ފައިސަލް ވިދާޅުވިއެވެ.

އެހެންކަމުން، މިކަން މިގޮތަށް ކުރިއަށް ގެންދެވުމަށްޓަކައި ރައީސް މުޢިއްޒުގެ ސަރުކާރުގެ ކެންޑިޑޭޓުން މަޖިލީހަށް އިންތިޚާބުކޮށް ސުޕާމެޖޯރިޓީ ނަނަްގަވައިދެއްވުމަށް ފައިސަލް ވަނީ ދިވެހީންގެ ކިބައިން އެދިވަޑައިގެންފައެވެ.