ކުރިއަށް އޮތް ހަފްތާގެ ތެރޭގައި، ހއ.ހޯރަފުށީގައި ހުރި ކުޑަކުދިންގެ ރީހެބިލިޓޭޝަން ސެންޓަރ ހުޅުވައި، ހިދުމަތްދޭން ފަށާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

ރޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ، ހޯރަފުށީގައި ހުރި  ރީހެބިލިޓޭޝަން ސެންޓަރ ފަށާނީ ޖުވެނައިލް ރެސިޑެންޓަލް ޓްރީޓްމެންޓް ސެންޓަރ އެއްގެ ގޮތުގައި ކަމަށާއި، އެތަނުން ފަރުވާ ދޭނީ އެޓް ރިސްކްގައި ތިބި އެންމެ ބޮޑަށް ފަރުވާ ބޭނުންވާ ކުދިން ކަމަށާއި، އެތަނުގެ ޖާގަ އޮތް ވަރަކުން ކުދިން ގެންގޮސް ފަރުވާ ދޭނެ ކަމަށެވެ.

ވަޒީރު އިހުސާން ވިދާޅުވީ، ކުޑަކުއްޖަކު ރިސްކާއި ހިސާބަށް އައުުން ފުރަތަމަ ގެންދަން ޖެހެނީ ރެސިޑެންޓަލް ޓްރީޓްމެންޓަށް ކަމަށާއި، މި ރެސިޑެންޓަލް ޓްރީޓްމެންޓް ސެންޓަރ ގައި ވަކި މުއްދަތަކަށް ބެހެއްޓުމަށްފަހު ދެން ގެންދާނީ ހާފްވޭ ހައުސް އަށް ކަމަށެވެ. އެގޮތުން ހޯރަފުށީގައި ހުރި ރިހެބިލިޓޭޝަން ސެންޓަރ ހަދާފައި ހުރީ ހާފްވޭ ހައުސް އެއްގެ ގޮތުގައި ކަމަށާއި، އެތަން މި ސަރުކާރު ވެރިކަމާއި ހަވާލުވި އިރު ނުހުޅުވި ހުރިކަން ވަޒީރު ވަނީ ހާމަކުރައްވާފައެވެ. ހާފްވޭ ހައުސް އަކީ ކުއްޖާ މުޖުތަމައު އަށް ދޫކޮށްލުމުގެ ކުރިން ބަހައްޓަން ލާޒިމް ކުރާ ތަނެކެވެ.

ދ.ކުޑަހުވަދޫގައި ހުރި ރެސިޑެންޓަލް ޓްރީޓްމެންޓް ސެންޓަރ މަރުކަޒު ނުހުޅުވި، ހޯރަފުށީގައި ހުރި ހާފްވޭ ހައުސް އާއި ހަމައަށް ދިޔުމަކީ ކުރެވޭނެ ކަމަކަށްނުވާތީ، ހޯރަފުށީގައި މިހާރު ހުރި ހާފްވޭ ހައުސް، ފުރަތަމަ ރެސިޑެންޓަލް ޓްރީޓްމެންޓް ސެންޓަރ އެއްގެ ގޮތުގައި ފެށުމަށް ސަރުކާރުން ނިންމީކަމަށް ވަޒީރު އިހުސާން ވަނީ ވިދާޅުވެފައެވެ.