މިއަހަރުގެ މިހާހިސާބަށް އައިރު، ރާއްޖޭގެ އެކި ސްކޫލްތަކުން ބުލީ ކުރުމުގެ 26 މައްސަލަ ފާހަގަކުރެވިފައިވާކަމަށް  ތައުލީމީ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ.

ރޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، މިއީ ވަރަށް ގިނަ އަދަދެއް ނަމަވެސް މިހާރު މިއޮތް ހިސާބުގައި  އެކަށިގެންވާ މަސައްކަތްތަކެއް ކުރެވިއްޖެ ކަމުގައިވާނަމަ މިކަން ހައްލު ކުރެވިގެންދާނެ ކަމަށެވެ.

ވަޒީރު ޝަފީއު ވިދާޅުވީ، ތައުލީމީ ވުޒާރާއިން އެކި އެކި ލެވެލްގައި ޓީޗަރުންނަށް ހިންގޭ ޕްރޮފެޝަނަލް ޑިވެލޮޕްމެންޓް ހަރަކާތްތަކާއި ބެލެނިވެރިންނަށް ހިންގޭ އަހުލުވެރިކުރުމުގެ ޕްރޮގްރާމްތަކުގެ އިތުރުން ދަރިވަރުންނަށް ހިންގޭ އެކި އެކި ސިވިކް ޕްރޮގްރާމް ތައް ފަދަ ހިންގަމުންދާ ކަމަށެވެ. މިފަދަ ޕްރޮގްރާމްތަކުގައި ކުދިންގެ އެންގަރ މެނޭޖް ކުރުމާއި ބުލީ ކުރުން ފަދަ ވިޔާނުދާ އަކި ކޮށްގެން ނުވާނެ ކަންތައްތަކަށް ކުދިން އަހުލުވެރިކުރުވާ، އެފަދަ ކަންކަމުން ދުރުހެލިކުރުވުގެ މައްޗަށް އަލިއަޅުވާލާކަން ވެސް ވަޒީރު ޝަފީއު ފާހަގަ ކުރެއްވިއެވެ.

ވަޒީރު ޝަފީއުގެ އިތުރުންވެސް، ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ވަޒީރު އަލީ އިޙްސާން ރޭ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަނީ ޖިނާޢީ ކުށުގެ ޒިންމާ އުފުލަން ޖެހޭ ޢުމުރު 15 އަހަރުން، 12 އަހަރަށް ދަށްކުރުމަށް ސަރުކާރުން ނިންމާފައިވާކަން އިއުލާންކުރައްވާފައެވެ.

މި ގާނޫނަށް ގެންނަން ޖެހޭ މުހިންމު ބަދަލުތައް އެޓަރނީ ޖެނެރަލްގެ އޮފީހަށް ފޮނުވުމަށް ވަނީ ތައްޔާރު ކުރެވިފައިވާކަމަށް ވަޒީރު އިހުސާން ވިދާޅުވެފައިވާއިރު، ބަންޑާރަ ނައިބު އަލްއުސްތާޛު އަހުމަދު އުޝާމް ވަނީ އީދު ބަންދު ނިންމާފައި، ހަފްތާއެއް ތެރޭ ގާނޫނަށް ގެންނަން ޖެހޭ މުހިންމު އިސްލާހުތައް ޑްރާފްޓު ކުރުމަށް ފަހު މަޖިލީހަށް ހުށައަޅާނެ ކަމަށް ވެސް ބުނެފައެވެ.