އިކުއެޑޯގެ ވެރިރަށް ކީޓޯގައި ހުންނަ މެކްސިކޯ އެމްބަސީއަށް އަށް ހަތިޔާރާއި އެކު އިކުއެޑޯގެ ފުލުހުން ވަދެގަތުމުން، މެކްސިކޯއިން އިކުއެޑޯ އާއި އެކު އޮތް ސިޔާސީ ގުޅުން ކަނޑާލައިފިއެވެ.
އިކުއެޑޯގެ ފުލުހުން އެމްބަސީއަށް ވަދެފައިވަނީ، އެތަނުން ހިމާޔަތް ހޯދަމުން އައި އިކުއެޑޯގެ ކުރީގެ ނައިބު ރައީސް ޖޯޖް ގްލާސް ހައްޔަރުކުރުމަށެވެ.
މެކްސިކޯގެ ޚާރިޖީ ވުޒާރާގެ އިސްމީހަކު ބުނީ، އިކުއެޑޯގައި ތިބި އެގައުމުގެ ޑިޕްލޮމެޓިކް ސްޓާފުން އިކުއެޑޯ ދޫކޮށް ވަގުތުން ފުރާނެކަމަށެވެ. ބައިނަލްއަގުވާމީ ގާނޫނާއި ޚިލާފު ކަމެއްގެ ގޮތުގައި މެކްސިކޯއިން މިކަން ސިފަކޮށްފައިވާއިރު، އެމެރިކާއިން ވެސް ވަނީ އިކުއެޑޯގެ މި އަމަލާއި ގުޅިގެން ކަންބޮޑުވުން ފާޅުކޮށްފައެވެ. ޑިޕްލޮމެޓިކް އުސޫލުތަކުގެ ދަށުން އެމްބަސީތަކަކީ އާންމުކޮށް ހިމާޔަތްކޮށްފައިވާ ޖާގަތަކެއްގެ ގޮތުގައި ބެލެވޭ ތަންތަންކަން ފާހަގަކޮށްލެވެއެވެ.
ލެޓިން އެމެރިކާގެ ދެ ގައުމުގެ މެދުގައި މި ހިތްހަމަނުޖެހުން ބޮޑުވެ، ދުރުވާން ފެށިތާ ދުވަސްތަކެއް ވެފައިވާއިރު، މިކަމުގެ ސަބަބަކީ މެކްސިކޯއިން 2013 އާއި 2017 އާ ދެމެދު އިކުއެޑޯގެ ނައިބު ރައީސްގެ މަގާމު އަދާކުރެއްވި ގްލާސް އަށް ސިޔާސީ ހިމާޔަތް ދިނުމަށް ނިންމުމެވެ.
ކޮރަޕްޝަންގެ ތުހުމަތުގައި ދެ ފަހަރެއްގެ މަތިން ކުށް ސާބިތުވެފައިވާ ގްލާސް ވަނީ އެއީ އޭނާ އަށް ސިޔާސީ ގޮތުން ކުރާ ގޯނާއެއް ކަމަށް ބުނެ މެކްސިކޯ އެމްބަސީގެ ތެރޭގައި ހިޔާވަހިކަން ހޯދާފައެވެ. އެހެންނަމަވެސް، މެކްސިކޯގެ ރައީސް އަންޑްރެސް މެނުއަލް ލޮޕޭޒް އޮބްރަޑޯރ މިދިޔަ ހުކުރު ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ، އިކުއެޑޯގެ ފުލުހުން ގަދަކަމުން އެމްބަސީއަށް ވަދެ، ކުރިމަތިވާ ގޯނާތަކާއި އުނދަގޫތަކުގެ ސަބަބުން އެތަނުގައި "ރެފިއުޖީ" އެއްގެ ގޮތުގައި ހުރި ގްލާސް ގެންގޮސްފައިވާ ކަމަށެވެ.
އިކުއެޑޯގެ ސަރުކާރުން ވެސް ވަނީ ގްލާސް ހައްޔަރުކޮށްފައިވާކަން ކަށަވަރުކޮށްދީ ބަޔާނެއް ނެރެފައެވެ. މި ބަޔާނުގައި ބުނީ، ގްލާސް ޖަލަށް ލުމަށް އެގައުމުގެ ކޯޓުން ހުކުމް ކޮށްފައިވާ ކަމަށާއި، މެކްސިކޯ އިން އޭނާއަށް ޑިޕްލޮމެޓިކް ހިމާޔަތް ދީފައިވަނީ އާންމު ގާނޫނީ އޮނިގަނޑާ ހިލާފަށް ކަމަށެވެ.
ގްލާސް ގެ މައްޗަށް ކުރެވޭ ތުހުމަތުތަކުގެ ތެރެއިން، އެންމެ ފަހުން އޭނާގެ މައްޗަށް ކޮށްފައިވަނީ، 2016 ވަނަ އަހަރު އިކުއެޑޯ އަށް އައި ބިންހެލުމުގައި އެހީތެރިކަން ފޯރުކޮށްދިނުމަށް ކަނޑައަޅާފައިހުރި އެގައުމުގެ ސަރުކާރުގެ ފައިސާ އަށް ޚިޔާނާތްތެރިވުމުގެ ތުހުމަތެވެ.
Advertisement
This content is created and paid for by advertisers and does not involve Voice Journalists
