ޖިންސީ ފުރައްސާރަ އާއި ކުޑަކުދިންނަށް ބުލީކުރުން ފަދަ ކަންކަން ގިނަވެފައިވާ ކަމަށާއި އެކަންކަން ހުއްޓުވުމުގެ ސިޔާސަތު މެނިފެސްޓޯގައި އޮންނާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، ރައްޔިތުންގެ މަޖިލީހުގެ ލ.ފޮނަދޫ ދާއިރާއަށް ވާދަކުރައްވާ ޕީއެންސީ ކެންޑިޑޭޓު އަބްދުއްރަހީމް އަބްދުﷲ އާއި ފެލިދޫ ދާއިރާއަށް ވާދަކުރައްވާ އާދަމް ޒާހިރުގެ ކެމްޕެއިނަށް ރޭ ބޭއްވި ޖަލްސާގައި ވާހަކަދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ، ގައުމުގައި ރައްކާތެރިކަން ގާއިމްކުރުމަކީ ސަރުކާރުގެ މައިގަނޑު އެއް ސިޔާސަތު ކަމަށްވާއިރު، ޖިންސީ ފުރައްސާރައާއި، ކުޑަކުދިންނަށް ބުލީ ކުރުމާއި ގެވެށި އަނިޔާފަދަ ނޭދެވޭ އެތައް ކަމެއް ގައުމުގައި ހިނގަމުންދާކަމަށާއި، މިފަދަ ކަންކަން ހައްލު ކުރުމުގެ ސިޔާސަތުތައް މެނިފެސްޓޯގައި އެބަ އޮތް ކަމަށެވެ.

ރައީސް ޑރ.މުޢިއްޒު ވިދާޅުވީ، މިކަން ކުރުމަށްޓަކައި އޯގާތެރި މުޖްތަމައެއް ބިނާކުރުމަށް އެއްބާރުލުން ދޭނެ ކެންޑިޑޭޓުން މަޖިލީހަށް ހޮވަންޖެހޭކަމަށާއި، އެކަމަށް އެއްބާރުލުން ދޭނީ ޕީއެންސީގެ ޓިކެޓުގައި ވާދަކުރައްވާ 93 ކެންޑިޑޭޓުން ކަމަށެވެ.

ރައީސް ޑރ.މުޢިއްޒު މިފަދައިން ވިދާޅުވެފައިވާއިރު، އއ.ރަސްދޫ މިސްކިތެއްގެ ވުޟޫ ކުރާ ބައިގައި ކުޑަކުއްޖަކަށް ގަނާކޮށް، އަނިޔާކުރި މައްސަލަ ވަނީ ފެންމަތިވެފައެވެ.

މި މައްސަލަ ވަރަށް ސީރިއަސް މައްސަލައެއްގެ ގޮތުގައި ފުލުހުން ބަލަމުން އަންނައިރު، ފުލުހުން ވަނީ އަނިޔާކުރިކަމަށް ތުހުމަތު ކުރެވޭ 13 އަހަރާއި 14 އަހަރުގެ ކުއްޖަކު ދެނެގަނެފައެވެ. ހަމައެއާއިއެކު މި މައްސަލަ ތަހުގީގުކުރުމަށް ކަމާބެހޭ ފަރާތްތަކުގެ ޓީމެއް ރަސްދޫގައި އިއްޔެ ވަނީ ހަރަކާތްތެރިވެފައެވެ.