ނިމިދިޔަ އެމްޑީޕީ ސަރުކާރުގައި، ތިން އިމާރާތް އަޅައި ނިންމޭނެ އަގުގައި ނ.މިލަދޫގައި އެއް އިމާރާތުގެ “ސްކެލެޓަން” އަޅާފައިވާ ކަމަށް ވިދާޅުވެ، އިކޮނަމިކް މިނިސްޓަރު މުހައްމަދު ސަޢީދު އެ ސަރުކާރަށާއި އެމްޑީޕީއަށް ވަރަށް ބޮަޑަށް ފާޑުވިދާޅުވެއްޖެއެވެ. 

ކުރއަށް އޮތް ރައްޔިތުންގެ މަޖިލީހުގެ އިންތިޚާބުގައި ހޯރަފުށީ ދާއިރާއަށް ޕީއެންސީގެ ފަރާތުން ވާދަކުރައްވާ އަލީ މޫސަގެ ރޭ ބޭއްވި ކެންޕެއިން ޖަލްސާގައި ވާހަކަ ދައްކަވަމުން ސަޢީދު ވިދާޅުވީ ނިމިދިޔަ ސަރުކާރުން މިލަދޫގައި 9 މިލިއަން ރުފިޔާ ދީފައި އަޅާފައިވަނީ އިމާރާތެއްގެ ތޮށި ގަނޑު އެކަނި ކަމަށެވެ. 

މިއާއެކު ސަޢީދު ވިދާޅުވީ، ކުރީގެ ރައީސް އިބްރާހީމް މުހައްމަދު ޞާލިހު ވެރިކަން ނިންމަވާލެއްވިއިރު ކަންކަން ނުނިމި، މޭޒު ކޮޅުގައި އޮތީ “ހުސް ކަރުދާސް” ކަމަށެވެ. އަދި އެ ވެރިކަން ބަދަލު ކުރީ ކަންކަން ނުނިމި، މިސްރާބުން ނެއްޓިގެން ދިޔުމުން ކަމަށްވެސް އޭނާ ވިދާޅުވިއެވެ. 

އެހެންކަމުން، އެ ސަރުކާރުގެ ދެތިން ހަތަރު ބޭފުޅުން މީސްމީޑިޔާގައި ދައްކަވާ ވާހަކަ އަކުން ރާއްޖެ ގުޑުވާ ނުލެވޭނެ ކަމަށް ސައީދު ވިދާޅުވިއެވެ. އަދި ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުގެ ދިފާއުގައި ޕީޕީއެމް/ ޕީއެންސީ އާއި ދިވެހި ރައްޔިރުން އެންމެ އިންޗިއެއްވެސް ދޫކޮށް ނުލައްވާނެ ކަމަށް ސައީދު ވިދާޅުވިއެވެ. 

ސަޢީދު ވިދާޅުވީ ވިޓޯލްގެ ޗާޓަށް ރާއްޖެ އެރުވުމަށް މީގެ ކުރިންވެސް ރައީސުން މަސައްކަތް ކުރެއްވި ކަމަށެވެ. ނަމަވެސް އެކަން ކުރެއްވީ ރައީސް މުއިއްޒު ކަމަށެވެ. ރައީސް މުޢިއްޒާއި އެނޫން ރައީސުންނާއި ހުރި ތަފާތަކީވެސް އެއީ ކަމަށް ސައީދު ވިދާޅުވިއެވެ.