މަޖިލީހަށް ހޮވިއްޖެނަމަ އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވައުދުފުޅުތައް ހަގީގަތަކަށް ހަދައިދެއްވަން ފުރިހަމަ އެއްބާރުލުން ދެއްވާނެކަމަށް ރައްޔިތުންގެ މަޖިލީސް އިންތިހާބުގައި ވެރިކަންކުރާ ޕީއެންސީގެ ފަރާތުން ހޯރަފުށީ ދާއިރާއަށް ވާދަކުރައްވާ ކެންޑިޑޭޓް، ޢަލީ މޫސާ ވިދާޅުވެއްޖެއެވެ.
ހޯރަފުށި، ތުރާކުނު، އަދި އުލިގަން ރައްޔިތުންގެ ތެރެއިން މާލޭގައި އުޅޭ ރައްޔިތުންނާ ރޭ ބައްދަލުކުރައްވުމަށް ރޭ ބޭއްވި ކެންޕެއިން ޖަލްސާގައި ވާހަކަދައްކަވަމުން ޢަލީ މޫސަ ވިދާޅުވީ، މަޖިލީހަށް ހޮވިއްޖެނަމަ އޭނާ ވެގެންދާނީ ސަރުކާރުގެ ވައުދުތައް ފުރިހަމައަށް އެއްބާރުލުން ދެއްވާ މެންބަރަކަށް ކަމަށެވެ.
އަޅުގަނޑުވާނީ ރައީސްގެ ސިޔާސަތުތައް ތަންފީޒުކޮށް، ވައުދުތައް ފުއްދުމަށް ފުރިހަމައަށް އެއްބާރުލުން ދޭނެ މެންބަރަކަށް. ތެދުވެރިކަމާއި އިހްލާސްތެރިކަމާއިއެކު، ދާއިރާގެ ތިން ރަށުގެ ރައްޔޮތުންނަށް ޚިދުމަތްކޮށްދިނުމުގައި ސާބިތުވެ ހުންނާނަން. ރައީސްގެ ވައުދުފުޅުތައް ހަގީގަތަކަށް ހަދައިދޭން މަސައްކަތް ކުރާނަން. ސަރުކާރާއި ގުޅިގެން، ހޯރަފުށި ތުރާކުނު އަދި އުލިގަމަށް ތަރައްގީ ގެނެސްދޭން މަސައްކަތް ކުރާނަން.
އަލީ މޫސަ
އަލީ މޫސާ އިތުރަށް ވިދާޅުވީ، އިންތިހާބު ކާމިޔާބު ވެއްޖެނަމަ، އެންމެ އިސްކަމެއް ދެއްވާނީ، ދާއުރާގެ ރައްޔިތުން އުފަލާއި، ހިތްހަމަޖެހުމާއެކު ދާއުރާގައި އުޅުމުގެ މަގު ފަހިކޮށްދެއްވުމުގެ ނިޒާމެއް ގާއިމް ކޮށްދެއްވުމަށެވެ.
އެއާއެކު ޒުވާނުންނާއި ކަނބަލުންނަށް ފަހި ފުރުސަތުތަކެއް ހޯއްދަވައިދެއްވަން މަސައްކަތް ކުރައްވާނެ ކަމަށްވެސް ޢަލީ މޫސަ ވިދާޅުވިއެވެ.
އަދި ހަމައެހެންމެ، ދާއިރާގެ ސިއްޙީ ހިދުމަތްތަކާއި ތަޢުލީމީ ހާލަތު އިތުރަށް ތަރައްޤީ ކޮށް ކުރިއެރުވުމަށް މަސައްކަތް ކުރައްވާނެ ކަމަށްވެސް ޢަލީ މޫސަ ވިދާޅުވިއެވެ.
މީގެ އިތުރުން، ސަރުކާރުން ހޯރަފުށީގެ ތަރއްގީއަށްޓަކައި މިހާރުވެސް ފަށާފައިވާ ޕްރޮޖެކްޓް ތަކުން ދާއިރާއަށް ބޮޑެތި ކުރިއެރުންތައް ލިބޭނެކަން ފާހަގަކުރައްވައި އަލީ މޫސަ ވަނީ އެކަމަށްޓަކައި ރައީސް މުޢިއްޒަށް ޝުކުރު އަދާކުރައްވާފައެވެ.
އަލީ މޫސަ ވަނީ، ހޯރަފުށީ ދާއިރާގެ ގޮނޑި ސަރުކާރަށް ހޯދައިދިނުމަށް ދާއިރާގެ ރައްޔޮތުން އެކަތި ގަނޑަކަށްވެ ގަދަ އަޅައި މަސައްކަތް ކުރުމަށް އެދިލައްވާފައެވެ.
Advertisement
This content is created and paid for by advertisers and does not involve Voice Journalists
