މިއަހަރު މާލޭގައި ފިތުރު ޒަކާތުގެ ގޮތުގައި މީހަކަށް 8000 ރުފިޔާގެ މަގުން ބަހަން ފަށައިފިއެވެ.

އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވީ، މާލެއަށް ފިޠުރު ޒަކާތް ދެއްކި އަދަދުވަނީ އިތުރުވެފައިކަމުން، މާލޭގައި ފަޤީރުންގެ ގޮތުގައި ދަފްތަރު ކުރެވިފައިވާ ކޮންމެ މީހަކަށް މިއަހަރު 8،000 ރުފިޔާގެ ރޭޓުން ފިޠުރު ޒަކާތް ބަހަން ފަށާފައިވާ ކަމަށެވެ.

ފިޠުރު ޒަކާތުގެ ފައިސާ ޖަމާވާނީ ސީދާ ސީދާ އެމީހެއްގެ އެކައުންޓަށްކަން ފާހަގަކުރައްވާ ވަޒީރު ވިދާޅުވީ، އެކި ސަބަބުތަކާހުރެ ޖަލުގައި ބަންދުވުމުގެ ސަބަބުން އަނބި ދަރިންނަށް ނިކަމެތި ކަން މެދުވެރި ވެފައިވާ ފަރާތްތަކުގެ ޢާއިލާތަކަށް ވެސް ފިޠުރު ޒަކާތުން އެހީތެރިކަން ލިބޭނެ ކަމަށާއި، ކުޑަކުދިންގެ ހިޔާއާއި ޚާއްޞަ އެހީއަށް ބޭނުންޖެހިފައިވާ ފަރާތްތަކުގެ މަރުކަޒުގައި ތިބި ފަރާތްތަކަށްވެސް ފިޠުރު ޒަކާތުން ލިބޭނެ ކަމަށެވެ.

ފިޠުރު ޒަކާތުގެ ގޮތުގައި ލިބުނު ފައިސާގެ އިތުރުން، ގޮވާމުގެ ގޮތުގައި ފިތުރު ޒަކާތުގެ ގޮތުގައި ލިބުނު ތަކެތި ބެހުމުގެ މަސައްކަތް ވެސް އިސްލާމީ ކަންތައްތަކާއި ބެހޭ ވުޒާރާއިން ކުރަމުން އަންނަަކަން ފާހަގަކޮށްލެވެއެވެ.