ޕީޕަލް ނެޝަނަލް ފްރޮންޓް (ޕީއެންއެފް) އުފެއްދުމަށް މިރޭ ގިޔާސުއްދީން ސްކޫލުގައި ބާއްވަން އޮތް ޖަލްސާ އަށް ފުލުހުން ހުރަސް އެޅުމުން އެ ޖަލްސާ ރާޅުގަނޑު ސަރަހައްދަށް ބަދަލުކޮށްފިއެވެ.

ރާޅުގަނޑު ނިއު ޕޯޓް ސަރަހައްދުގައި މި ބައްދަލުވުން ބޭއްވުމަށް ނިންމާފައިވަނީ، މިރޭ ނުވައެއް ޖެހި އިރު ބޭއްވުމަށް ހަމަޖެހިފައިވާ ޖަލްސާ އަށް ފުލުހުން ހުރަސް އަޅައި، ސްކޫލު ގޭޓު ބަންދުކުރުމާއި ގުޅިގެންނެވެ.

މިކަމާއި ގުޅިގެން ފުލުހުން ބުނީ، އެ ޖަލްސާ އަކީ ގިޔާސުއްދީން ސްކޫލުން ހުއްދަ ދީފައިނުވާ ޖަލްސާ އަކަށް ވާތީ، އެ ޖަލްސާ ހުއްޓުވައި، ސްކޫލް ރައްކާތެރި ކުރުމަށް މިނިސްޓްރީ އޮފް އެޑިއުކޭޝަންގައި އެ ސްކޫލުން އެދިފައިވާ ކަމަށެވެ. ފުލުހުން ބުނީ މި ޖަލްސާ ހުއްޓުވީ މި ސަބަބާއި ހުރެ ކަމަށެވެ.

ނަމަވެސް އޭގެ އިރުތަކެއް ފަހުން އެ ޕާޓީއަށް ނިސްބަތްވާ 400 އެއްހާ މީހުން ސްކޫލު ހޯލަށް ވަތް ނަމަވެސް އިލެކްޝަން ކޮމިޝަންގެ މަންދޫބަށް ސްކޫލަށް ނުވަދެވުމުން އަނެއްކާވެސް ޖަލްސާ ނުފެށި ލަސްތަކަކާއި ކުރިމަތިލާން ޖެހުނެވެ. ނަމަވެސް ޕާޓި އުފެއްދުމުގެ އިސްކޮށް އުޅުއްވާ މަލީހަ ޖަމާލް ވިދާޅުވީ މި ޖަލްސާ ބޭއްވުމަށް ހުއްދަ ލިބިފައިވާތީ  ޖަލްސާ ރާޅުގަނޑު ސަރަހައްދަށް ބަދަލުކޮށްފައިވާ ކަމަށެވެ.