ރޭގައި އަލިފާނުގެ ހާދިސާއެއް މ. ރަބީއުވިލާގެ ތަޅާލުމުގެ މަސައްކަތް ވަރަށް އަވަހަށް ކުރިއަށް ގެންދާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ވަޒީރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، އަލިފާނުގެ ހާދިސާ ހިނގި ގެޔަކީ މީހުން ނޫޅޭތާ ގިނަ ދުވަސްވެފައިވާ ބޮލަށް ވެއްޓޭވަރަށް ބާވެފައިވާ ގެޔެއް ކަމަށެވެ.
އެހެންކަމުން އެހިސާބުގެ މަގުމަތީގައި ހިނގާބިގާވެ އުޅޭ މީހުންނަށް ކުރިމަތިވެދާނެ ނުރައްކާތެރި ހާދިސާ ހިނގުމަށް މެދުވެރިވެދާނެތީ، ސަރުކާރުގެ ކަމާ ގުޅުން ހުރި ފަރާތްތަކާއި ވާހަކަދައްކައިގެން އެ އިމާރާތް ތަޅާލުމުގެ މަސައްކަތް ވަރަށް އަވަހަށް ކުރިއަށްގެންދަވާނެ ކަމަށް ވަޒީރު ވިދާޅުވިއެވެ.
ރޭގައި އަލިފާނުގެ ހާދިސާއެއް ހިނގާފައިވަނީ ކެނެރީމަގުގައި ހުންނަ ރަބީއުވިލާގޭ ހަތަރު ވަނަ ފަންގިފިލާގައެވެ. މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވި ނަމަވެސް ގެ ވަނީ ވަރަށް ބޮޑަށް ހަލާކުވެ ބޮޑެތި ގެއްލުންތަކެއް ލިބިފައެވެ.
އެމްއެންޑީއެފުން ބުނި މި ހާދިސާގެ މައުލޫމާތު ލިބުނީ ރޭގައި 20:19 ހާއިރު ކަމަށާއި، އެ ރިޕޯޓު ލިބުމާއެކު ފަޔާ އެންޑް ރެސްކިއު ސާވިސްއިން ގޮސް، އަލިފާން ނިއްވުމުގެ މަސައްކަތް ފެށިކަމަށެވެ. އެ ގޭގައި ރޯވި އަލިފާންގަނޑު ކޮންޓްރޯލް ކުރީ ރޭ 21:12 ހާއިރުއެވެ.
Advertisement
This content is created and paid for by advertisers and does not involve Voice Journalists
