ލ.މާވަށުގައި ކުރިން ހިއްކުމަށް ހަމަޖެހިފައިވާ 15 ހެކްޓަރުގެ ބަދަލުގައި 30 ހެކްޓަރުގެ ބިން މި ސަރުކާރުން ހިއްކާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ މިހާރު ލ އަތޮޅަށް ކުރައްވާ ދަތުރުފުޅުގެ ތެރެއިން އެއަތޮޅު މާވަށަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.
މިގޮތުން ރާއްޖެ އަށް އެންމެ ބޭނުންވަނީ ބޯހިޔާވަހިކަން ކަން ފާހަގަކުރައްވައި ރައީސް ޑރ.މުޢިއްޒު ވިދާޅުވީ، އެކަމަށް ބޭނުންވާ ބިން ނެތް ރަށްރަށުގެ ތެރޭގައި މާވަށް ވެސް ހިމެނޭ ކަމަށެވެ.
"ތިބޭފުޅުންނަށް ކުރީގައި އޮތީ 15 ވަރަކަށް ހެކްޓަރުގެ މަޝްރޫއުއެއްގެ މަސައްކަތް. އަޅުގަނޑު ގަސްތުކުރަނީ އަދި ރައްޔިތުން ވެސް ބޭނުންވެލައްވަނީ އެވަރެއް ނޫން. އެހެންވީމަ އެޔަށް ވުރެ އިތުރު ކުރަން. އެހެންވީމަ އަޅުގަނޑު ދަންނަވާލަން ބޭނުންވަނީ 15 ހެކްޓަރެއް ނޫނޭ. 30 ހެކްޓަރުގެ ބިން ހިއްކުމުގެ މަޝްރޫއެއް މިރަށުގައި އަޅުގަނޑުމެން ކުރިއަށް ގެންގޮސްދޭނަމޭ."
ރައީސް ޑރ.މުޢިއްޒު ވިދާޅުވިއެެވެ.
ރައީސް ޑރ.މުޢިއްޒު ވިދާޅުވީ، މި މަޝްރޫއުގެ އަމަލީ މަސައްކަތްތައް ފަށާނެ ކަމަށާއި އޭގެތެރެއިން ފުރަތަމަ ކުރަންޖެހޭނީ ބިން ހިއްކުމުގެ ކުރިން ޖަހަން ޖެހޭ ބަންޑް ވޯލްގެ މަސައްކަތް ކަމަށާއި އެމަސައްކަތް ބާރަށް ކުރިޔަށް ގޮސް 30 ހެކްޓަރު ހަމަކޮށް ދެއްވާނެކަމަށެވެ.
މިފަދައިން 30 ހެކްޓަރު ހިއްކުމަށް ނިންމެވީ، ޒުވާނުންނާއި އެކި އުމުރުފުރައިގެ މީހުންނަށް ބޭނުންވާ ގެދޮރުގެ މައްސަލައަށް އެންމެ ބޮޑު ހައްލެއް ލިބޭނެ ކަމަކަށް ވާނެތީ ކަމަށްވެސް ރައީސް ޑރ.މުޢިއްޒު ވިދާޅުވިއެެވެ.
Advertisement
This content is created and paid for by advertisers and does not involve Voice Journalists
